फिफा विश्वकप–२०२६ को समूह ‘आई’अन्तर्गत बुधबार हुने पहिलो खेलमा उपाधिको बलियो दाबेदार फ्रान्स र अफ्रिकी टोली सेनेगल आमने–सामने हुँदैछन् ।

सेनेगल र फ्रान्सबीचको खेल अमेरिकाको न्यू योर्कस्थित मेटलाइफ स्टेडियममा नेपाली समयअनुसार, बिहान ००:४५ बजे शुरू हुनेछ ।

सन् २००२ को विश्वकपमा सेनेगलले फ्रान्सलाई १–० गोलले स्तब्ध बनाएको त्यो ऐतिहासिक नतिजाकै पुनरावृत्ति गर्ने लक्ष्यसहित ‘लायन्स अफ तेरंगा’ मैदानमा ओर्लने छ ।

पूर्वच्याम्पियन फ्रान्स भने अघिल्लो विश्वकपको पीडा बिर्सिएर सुखद शुरूआत गर्ने दाउमा छ । फ्रान्सका मुख्य प्रशिक्षक डिडियर डेसच्याम्पसका लागि यो विश्वकप विशेष छ ।

जारी विश्वकप सकिएलगत्तै उनले जिनेदिन जिदानलाई आफ्नो जिम्मेवारी हस्तान्तरण गर्दै फ्रान्सेली टोलीबाट बिदा लिने तयारी गरेका छन् ।

विश्वकप जित्ने खेलाडी र प्रशिक्षक दुवैको कीर्तिमान बनाइसकेका डेसच्याम्पसले विश्वकपको मञ्चमा अहिलेसम्म १४ खेल जितेका छन् ।

यो विश्वकपको समूहगत चरणमा शतप्रतिशत जित निकालेर उनी जर्मन प्रशिक्षक हेल्मुट शोनको १६ खेलको कीर्तिमान तोड्दै सर्वाधिक सफल विश्वकप प्रशिक्षक बन्ने योजनामा छन् ।

सन् २०१८ को विश्वकप विजेता फ्रान्स पछिल्लो समय उत्कृष्ट लयमा छ । केही समयअघि आइभरी कोस्टसँग पराजित भए पनि लगत्तै उत्तरी आयरल्यान्डलाई ३–१ गोलले हराउँदै टोलीले लयमा फर्किएको संकेत दिइसकेको छ ।

खासगरी, माइकल ओलिसको उत्कृष्ट प्रदर्शन र केलियन एमबाप्पेको जादुमयी लय फ्रान्सको मुख्य हतियार हुन् । एमबाप्पे हाल फ्रान्सका लागि ५६ गोल गर्दै ओलिभिर गिरोडको कीर्तिमाननजिक छन् ।

अर्कोतिर, सेनेगलका लागि प्रशिक्षक पेप थियावको उपस्थितिले विशेष अर्थ राख्छ । २४ वर्षअघि फ्रान्सलाई हराउँदा उनी टोलीका महत्त्वपूर्ण सदस्य थिए ।

विश्वकप छनोटमा अपराजित रहँदै आएको सेनेगलका लागि साडियो मानेको पुनरागमन सबैभन्दा ठूलो सकारात्मक पक्ष हो ।

चोटका कारण सन् २०२२ को विश्वकप गुमाएका माने यसपटक पूर्ण रूपमा ‘फिट’ छन् र टोलीको अग्रपंक्तिको नेतृत्व गर्न तयार छन् ।

फ्रान्सका लागि विलियम सालिबाको चोट चिन्ताको विषय बनेको थियो । तर, उनी पूर्ण रूपमा ‘फिट’ भएर प्रशिक्षणमा फर्किसकेका छन् ।

सेनेगलको टोलीमा असाने डियाओ र इड्रिसा गुयेको सामान्य चोटले केही चिन्ता बढाए पनि उनीहरू उपलब्ध रहने सम्भावना छ ।

तथ्यांकले फ्रान्सको पक्षमा नतिजा देखाए पनि दुई दशकअघिको त्यो हारलाई बिर्साउन फ्रान्सेली टोलीले निकै मिहिनेत गर्नुपर्ने देखिन्छ ।

फ्रान्सेली टोलीको आक्रामक शैली र सेनेगलको रक्षात्मक सन्तुलनबीचको यो खेल निकै रोमाञ्चक हुने अपेक्षा गरिएको छ ।