०४ असार २०८३, बिहीबार
नक्कली शैक्षिक योग्यताको प्रमाणपत्र पेस गरी बालविकास सहजकर्ताको जागिर खाएको आरोपमा अख्तियार दुरुपयोग अनुसन्धान आयोगले एक जनाविरुद्ध भ्रष्टाचार मुद्दा दायर गरेको छ ।
आयोगले पाँचथरको हिलिहाङ गाउँपालिका–७ स्थित जय भवानी माध्यमिक विद्यालय अन्तर्गत सञ्चालित बालविकास केन्द्रमा कार्यरत सहयोगी कार्यकर्ता बिना कुमारी राईविरुद्ध बुधबार विशेष अदालत, काठमाडौंमा आरोपपत्र दायर गरेको हो ।
आयोगका अनुसार राईले बालविकास सहजकर्ताको पदमा नियुक्ति लिन कक्षा ८ र एसएलसीको लब्धांक पत्र (मार्कसिट) तथा चरित्र प्रमाणपत्रसम्बन्धी झुट्टा र नक्कली शैक्षिक योग्यताका प्रमाणपत्र पेस गरेकी थिइन् ।
अनुसन्धानका क्रममा उनले नक्कली शैक्षिक प्रमाणपत्रका आधारमा राष्ट्रसेवक पदमा नियुक्ति प्राप्त गरी सरकारी सेवा सुविधा समेत लिएको पुष्टि भएपछि आरोपपत्र पत्र दायर गरिएको आयोगका प्रवक्ता सुरेश न्यौपानेले जानकारी दिए ।
आयोगले उनलाई भ्रष्टाचार निवारण ऐन, २०५९ को दफा १६ उपदफा (१) बमोजिमको कसुरमा सोही ऐनअनुसार कैद र जरिवानाको माग गर्दै मुद्दा दायर गरेको प्रवक्ता न्यौपानेले जनाएका छन् ।
