०९ असार २०८३, मंगलबार
फिफा विश्वकप २०२६ को समूह 'डी' अन्तर्गतको खेलमा पाराग्वेले टर्कीविरुद्ध १–० को ऐतिहासिक र सनसनीपूर्ण जित दर्ता गरेको छ । खेलको पहिलो हाफमै आफ्ना मुख्य खेलाडी मिगुएल आल्मिरोनले अनौठो नियमका कारण रातो कार्ड पाएर मैदान छाडेपछि १० खेलाडीमा सीमित बनेको पाराग्वेले विश्वकप इतिहासकै एउटा उत्कृष्ट रक्षात्मक खेल प्रदर्शन गर्यो ।
हारसँगै टर्कीको जारी विश्वकपको समूह चरण पार गर्ने सपना र आशाहरू पूर्ण रूपमा समाप्त भएका छन् ।
खेलको अन्तिम सिट्ठी बज्नेबित्तिकै टर्कीका कयौँ खेलाडीहरू मैदानमै घुँडा टेक्न पुगे भने केही खेलाडीहरू भक्कानिएर रोए । कतिपयले निराशामा आफ्नो टाउको हातले समातेका थिए ।
टर्कीले खेलमा आफ्नो तर्फबाट सम्पूर्ण शक्ति झोकेको थियो । तथ्याङ्क हेर्ने हो भने टर्कीले खेलभरि ८० प्रतिशत बल पसेसन (नियन्त्रण) राखेको थियो । त्यस्तै, विपक्षीको डि-बक्सभित्र ५१ पटक बल छोएको टर्कीले १२ वटा कर्नरसहित कुल ३२ पटक गोलको प्रयास (शट्स) गरेको थियो ।
तर, पहिलो खेलमा अष्ट्रेलियाविरुद्ध ३० पटक प्रहार गर्दा पनि गोल गर्न नसकेको टर्कीले यसमा पनि गोलको खाता खोल्न सकेन । लगातार दुई खेलमा ६२ पटक गोलको प्रयास गर्दा पनि टर्की शून्यमै रोकिनु उसको मुख्य कमजोरी बन्यो ।
यो खेल पाराग्वेको डिफेन्सका लागि सधैँ सम्झिनलायक रहनेछ । विश्वकपकै सबैभन्दा छिटो गोल गरेर १–० को अग्रता लिएको पाराग्वे आल्मिरोन बाहिरिएपछि पूर्ण रूपमा रक्षात्मक रणनीतिमा उत्रिएको थियो । टर्कीका हरेक क्रस, पास र प्रहारका अगाडि पाराग्वेका डिफेन्डरहरू ढाल बनेर उभिए ।
