कोशी प्रदेश लगानी प्राधिकरणले प्रदेशको आर्थिक विकासका लागि विभिन्न क्षेत्रका चारवटा आयोजनाको लगानी स्वीकृत गरेको छ । 

प्राधिकरणको हालै सम्पन्न ३३ औं बैठकले सार्वजनिक निजी साझेदारी (पीपीपी) अवधारणा अन्तर्गत निर्माण हुने गरी २ अर्ब ८ करोड ५३ लाख रूपैयाँ बराबरको लगानी स्वीकृत गरेको हो ।

गत वर्षको वैशाख महिनामा सम्पन्न भएको कोशी प्रदेश लगानी सम्मेलनमा प्रस्तुत गरिएका आयोजनामध्ये चारवटाको प्रस्तावलाई अन्तिम रूप दिइएको प्राधिकरणले बिहीबार पत्रकार सम्मेलन आयोजना गरी जानकारी हो । 

स्वीकृत परियोजनामा सुनसरीको दुहवी–४ मा ५५ करोड ९५ लाख रूपैयाँ लागतको फोहोरमैला व्यवस्थापन परियोजना र दुहवीकै वडा नम्बर ४ र १० मा ३४ करोड लगानीमा निर्माण हुने मल्टी चेम्बर एण्ड कोल्ड स्टोरेज एग्रो प्रोसेसिङ रहेका छन् । यी आयोजना क्रमश: रिभाइभ इन्फ्राटेक एण्ड इन्भेस्टमेन्ट र दीर्घायु एग्रो एण्ड इन्भेस्टमेन्टले निर्माण गर्नेछन् ।

त्यसैगरी, रामपुर बहुउद्देशीय कृषि फार्म कम्पनीले उदयपुरको बेलका–९ मा २० करोडको लगानीमा फोहोरमैला व्यवस्थापनसहित मल कारखाना र पशुपालन परियोजना सञ्चालन गर्नेछ । 

सुनसरीको रामधुनी–७ स्थित रास ताल क्षेत्रको पूर्वाधार विकास र सञ्चालनका लागि अर्बान एक्सप्लोरर प्रालिलाई ९८ करोड ५८ लाख रूपैयाँ लगानीको अनुमति दिइएको छ ।

प्राधिकरणका कार्यकारी निर्देशक सरोज कोइरालाले यी आयोजनाको परियोजना विकास सम्झौता (पीडीए) चालु आर्थिक वर्ष २०८२/८३ भित्रै सम्पन्न गर्ने लक्ष्य रहेको जानकारी दिए । 

कोइरालाका अनुसार विराटनगरको रानीदेखि बसपार्कसम्मको क्षेत्रमा करिब ६ अर्बको लगानीमा पोड–वे निर्माण गर्न काठमाडौं पोड-वे कम्पनीलाई विस्तृत परियोजना प्रतिवेदन तयार पार्न अनुमति दिइएको छ ।

प्राधिकरणकै पहलमा प्रदेशको पहिलो आयोजनाका रूपमा भेडेटार स्काइ वाक निर्माण सम्पन्न भई सञ्चालनमा आइसकेको छ, जसबाट सरकारलाई १ करोड ५० लाख रूपैयाँ राजस्व प्राप्त भएको छ ।

यसबाहेक प्राधिकरणले ग्रीन हाइड्रोजन, बायोइथानोल, लिम्चुङबुङ परियोजना र गुप्तबराह मोनोरेल जस्ता योजनामा लगानीको सम्भाव्यता खोजी गरिरहेका लगानीकर्तासँग समन्वय गरिरहेको र ती परियोजना अध्ययनका काम विभिन्न चरणमा अघि बढिरहेको कोइरालाले जानकारी दिए  । 

ऊर्जा उत्पादनका लागि आवश्यक नियमावली अभाव रहेकाले सरकारले त्यसको ड्राफ्ट तयार पार्न निर्देशन दिइसकेको समेत प्राधिकरणले जनाएको छ ।