बुटवलस्थित लुम्बिनी प्रादेशिक अस्पताललाई सरकारले जग्गा उपलब्ध गराउने भएको छ ।

बुधबार बसेको मन्त्रिपरिषद् बैठकले अस्पतालसँग जोडिएको सेक्टर वन कार्यालय, बुटवलको जग्गा प्रादेशिक अस्पताललाई आवश्यक संरचना निर्माणका लागि दिने निर्णय गरेको हो ।

लामो समयदेखि रोकिएको जग्गा अस्पतालले पाउने निर्णयसँगै अस्पतालको विकास र सेवा विस्तारमा टेवा पुग्नेछ । 

अहिले सेक्टर वन कार्यालयको भवन र जग्गा इलाका प्रशासन कार्यालयले प्रयोग गरेको छ । प्रादेशिक अस्पतालदेखि दक्षिणतर्फ रहेको १ बिगाह ८ कट्ठा जग्गा अस्पतालको पूर्वाधार विस्तारका लागि उपलब्ध गराउने निर्णय भएको छ । 

सरकारले जग्गा उपलब्ध गराउने निर्णय गरेसँगै लामो समयदेखि अवरुद्ध अस्पतालको पूर्वाधार विकास कार्य अगाडि बढाउन सहज हुने भएको छ ।

उक्त वनको जग्गा प्राप्तिका लागि नेकपा महासचिव तथा पूर्व अर्थमन्त्री विष्णु पौडेलले निरन्तर पहल गरेका थिए । 

अस्पतालले करीब ८ अर्ब हाराहारीको लागतमा अत्याधुनिक सुविधासम्पन्न भवन निर्माण गर्ने गुरुयोजना सार्वजनिक गरिसकेको छ । प्रदेश सरकारले अस्पताललाई गौरवको योजनाका रूपमा अगाडि बढाएको छ । 

प्रादेशिक अस्पतालका लागि उक्त वन कार्यालयको जग्गा लिएबापत बुटवल उपमहानगरपालिकाले सोही क्षेत्रफल बमोजिमको जग्गा अन्य क्षेत्रमा वन कार्यालयका उपलब्ध गराउने छ । 

लुम्बिनी प्रादेशिक अस्पतालका अध्यक्ष सूर्यबहादुर भट्टराईले अस्पतालको अत्याधुनिक भवन निर्माणका लागि प्रक्रिया अगाडि बढाइएको बताउँदै यसले अस्पतालको विकासका लागि सहज बाटो खुलेको बताए ।

उनले जग्गा प्राप्तिसँगै अस्पतालको विकासको ढोका खुल्ने बताए ।

अस्पताल परिसरका व्यावसायिक सटरहरू भत्काएर पर्खाल लगाउने काम अब अगाडि बढाउँदै छ । त्यस्तै अस्पतालको उत्तरपट्टि रहेका जग्गाहरू पनि खाली गराएर नयाँ संरचना निर्माणको कामलाई अगाडि बढाइएको छ ।