नवलपरासी (बर्दघाट–सुस्ता) मा मोतियाबिन्दु भएका १८३ बिरामीको निःशुल्क शल्यक्रिया गरिएको छ ।

काठमाडौंको तिलगंगा आँखा प्रतिष्ठान, रोटरी क्लब अफ कावासोती, मध्यबिन्दु जिल्ला अस्पतालको संयुक्त आयोजना तथा रोट्रयाक्ट क्लब अफ कावासोती, मध्यबिन्दु आँखा उपचार केन्द्रलगायत विभिन्न संस्थाको सहयोगमा मोतियाबिन्दुका बिरामीको निःशुल्क शल्यक्रिया गरिएको हो । 

कावासोती–१६ मा रहेको मध्यबिन्दु जिल्ला अस्पतालमा ४ दिनसम्म सञ्चालन गरिएको शिविरबाट मोतियाबिन्दुका बिरामी लाभान्वित भएका रोटरी क्लब अफ कावासोतीका अध्यक्ष जीवन सापकोटाले जानकारी दिए ।

जिल्लाका ८ वटै स्थानीय तहबाट आएका आँखाको बिरामीको परीक्षण गर्दा मोतियाबिन्दु भेटिएका बिरामीको निःशुल्क शल्यक्रिया गरिएको सापकोटाले बताए । आँखाको परीक्षण गर्न आएका १ हजारभन्दा बढीको बिरामीमध्ये करीब २०० जनामा मोतियाबिन्दुको समस्या देखिएको अध्यक्ष सापकोटाले बताए ।

‘शिविरमा आँखा परीक्षण गर्न आउँदा मोतियाबिन्दु देखिएका सबै बिरामीको शल्यक्रिया गर्न सकिएन,’ अध्यक्ष सापकोटाले भने, ‘उहाँहरूको स्वास्थ्य समस्याका कारण हाललाई शल्यक्रिया गर्न नसकिएको हो ।’

तिलगंगा आँखा प्रतिष्ठान काठमाडौंका लिना बज्राचार्यको नेतृत्वमा आएको नेत्र रोग विशेषज्ञ डा. अनिमा देसार, डा. क्षितिज जङ्ग लगायत १५ जनाको समूहले बिरामीको आँखा परीक्षण तथा मोतियाबिन्दुको शल्यक्रिया गरेको थियो । रोटरी क्लबले आउँदा वर्षहरूमा पनि निःशुल्क आँखा परीक्षण र मोतियाबिन्दुको निःशुल्क शल्यक्रिया कार्यक्रमलाई निरन्तरता दिनका लागि तिलगंगा आँखा प्रतिष्ठानसँग प्रस्ताव समेत गरेको अध्यक्ष सापकोटाले बताए ।

आँखा परीक्षणका लागि पुगेका बिरामीको निःशुल्करूपमा मधुमेह परीक्षण, रक्तचाप परीक्षण, कोभिड–१९ को परीक्षण तथा आवश्यकताअनुसार निःशुल्करूपमा औषधि तथा चस्मा पनि प्रदान गरिएको थियो । आँखा शिविरको उद्घाटन कार्यक्रम रोटरी डिस्ट्रिक ३२९२ का पूर्वगभर्नर रवीन्द्र पियाले मानवीय अंगमध्ये आँखा संवेदनशील भएकाले यसको सुरक्षाको लागि सचेत हुनुपर्ने बताए ।

आँखामा केही समस्या देखिएमा जथाभावी औषधिको प्रयोग गर्न नहुने भन्दै पियाले तुरुन्तै आँखा रोग विशेषज्ञलाई देखाउनुपर्ने बताए ।