तत्कालीन प्रधानमन्त्री केपी शर्मा ओलीले करीब ९ महिनाअघि निकै तामझामका साथ उद्घाटन गरेको धरहरा निर्माणको काम अझै ३३ प्रतिशत बाँकी रहेको छ ।

धरहराको स्तम्भ ठडिए पनि समग्र भौतिक प्रगति ६७ प्रतिशतमा सीमित छ ।

ट्रिपल बेसमेन्ट, तीन तलाको पार्किङ स्पेस, अगाडिपट्टिको भागमा हरियाली, उत्तरपट्टिको क्षेत्रमा म्युजियम बनाउने लगायत काम निकै सुस्त गतिमा भइरहेको छ ।

मुख्य स्तम्भको फिनिसिङको काम पनि अझै बाँकी छ ।

समग्र भौतिक प्रगति ६७ प्रतिशत र खर्च ६१ प्रतिशत भएको केन्द्रीय आयोजना कार्यान्वयन इकाइ(भवन तथा आवास)का कामु आयोजना निर्देशक कोषनाथ अधिकारीले लोकान्तरलाई जानकारी दिए ।

जीआईईटीसी एन्ड रमन जेभीले ३ अर्ब ४९ करोडमा निर्माण सम्पन्न गर्ने गरी धरहराको ठेक्का पाएको थियो ।

आउँदो चैत्र मसान्तसम्म म्याद रहेकोमा फिनिसिङ र ल्यान्डस्केपिङको काम गर्नका लागि थप समय आवश्यक परेकाले असार मसान्तसम्म म्याद थप्न अनुरोध गर्ने तयारी भएको अधिकारीले बताए ।

विभिन्न कारणले गर्दा समयमै निर्माण सम्पन्न गर्न नसकिएको अधिकारीको भनाइ छ ।

'हुलाक कार्यालयको जग्गा प्राप्ति, सञ्चयकोषसँग जग्गा सट्टापट्टा आदि कामले समय लिएको र कोरोना महामारीले काम प्रभावित भएकाले ढिलाइ भएको हो,' उनले भने ।

पहिले धरहरा पुनर्निर्माणको काम जम्मा ५ रोपनी क्षेत्रफलमा गर्ने भनेर अगाडि बढेकोमा अहिले धेरै कुरा विस्तार भएर ४२ रोपनी क्षेत्रफलमा विस्तार भएको जानकारी निर्देशक अधिकारीले जानकारी दिए।

धरहरा उद्घाटन भइसकेको सुनेका सर्वसाधारणहरू भने अगाडिको रोडबाट मूल स्तम्भ हेरेर फर्किन बाध्य छन् ।

काठमाडौं रानीवनबाट स-परिवार घुम्न आएकी सुस्मिता आलेले धरहरा चढ्न नपाएकोमा गुनासो व्यक्त गरिन् ।

'काम निकै सुस्त गतिमा भएको रहेछ,' उनले भनिन्, 'सरकारले छिटो नबनाइदिँदा हामीले धरहरा चढ्न पाएनौं ।'

स्वयम्भूदेखि आएका हर्क गुरुङले पनि निर्माणको कामले समय लिँदा धरहरा आसपासमा पनि गञ्जागोल भएको बताए ।

'धरहरा पुनर्निर्माणमा ढिलाइ हुँदा यस वरिपरिको अवस्था पनि गञ्जागोल छ,' उनले भने ।

कति समय कुर्नुपर्छ धरहरा चढ्न?

केन्द्रीय आयोजना कार्यान्वयन इकाइ(भवन तथा आवास)का कामु आयोजना निर्देशक कोषनाथ अधिकारीले निर्माण सम्पन्न भएर सञ्चालनमा आउन अझै एक वर्ष लाग्ने बताए ।

‘पूर्णरूपमा निर्माण सम्पन्न नभई सर्वसाधारणलाई धरहरा चढाउन उपयुक्त हुन्न ।

निर्माण सम्पन्न भएर काठमाडौं महानगरपालिकालाई हस्तान्तरणको प्रक्रिया पूरा गरेपछि मात्र सर्वसाधारणले धरहरा चढ्न पाउँछन्,’ उनले भने ।