१३ असार २०८३, शनिबार
नेपाल विज्ञान तथा प्रविधि प्रतिष्ठान (नाष्ट)ले सबै प्रदेशमा विशिष्टकृत अनुसन्धान केन्द्र स्थापना गर्ने भएको छ ।
बिहीवार भएको नास्टको ४५औँ प्राज्ञसभाले सातवटै प्रदेशमा अनुसन्धान केन्द्र स्थापना गर्ने निर्णय गरेको हो । प्रदेश १ को विराटनगर, मधेशको बर्दिवास, बागमतीको चितवन–रामपुर, गण्डकीको पोखरा, लुम्बिनीको दाङ, कर्णालीको सुर्खेत र सुदूरपश्चिम प्रदेशको महेन्द्रनगरमा अनुसन्धान केन्द्र स्थापना गर्ने निर्णय भएको शिक्षा विज्ञान तथा प्रविधि मन्त्रालयले जनाएको छ ।
उक्त केन्द्रले प्रदेशस्तरमा विज्ञान तथा प्रविधि क्षेत्रमा विभिन्न खोज एवं अनुसन्धानका कार्य गर्ने छ । त्यस्तै, केन्द्रले विभिन्न अध्ययन, अनुसन्धान कार्यलाई व्यवस्थित बनाउँदै त्यसमा संलग्न जनशक्तिलाई सहयोग उपलब्ध गराउने छ ।
सभाले प्रदेशस्तरीय अनुसन्धान केन्द्र स्थापना एवं सञ्चालनका लागि केन्द्रीय समिति र व्यवस्थापन समिति पनि गठन गरेको छ ।
सभाले नेपाल सरकारले नास्टका लागि छुट्याएको बजेट रकम थप गर्न पहल गर्ने निर्णय पनि गरेको छ । बजेटमा नास्टका लागि कम बजेट छुट्याइएको निष्कर्ष निकाल्दै सभाले थप बजेटका लागि पहल गर्ने निर्णय गरेको हो ।
