नेपाली साङ्गीतिक क्षेत्रमा केही बाल गायक–गायिकाहरुको चर्चा पनि कम छैन ।

सानो उमेरमै आफ्नो गायकीको कारण लोभलाग्दो चर्चा कमाउनेहरू थुप्रै छन् ।

सुप्रिम मल्ल ठकुरी त्यसैमध्येका एक बाल गायक हुन्, जसले सानो उमेरमै साङ्गीतिक क्षेत्रमा लोभलाग्दो ख्याति कमाएका छन् । 

आगामी वैशाखमा ११ वर्ष पुग्दै गरेका ५ कक्षामा अध्ययनरत उनले दर्जनौं गीतमा आफ्नो सुमधुर स्वर दिइसकेका छन् । 

स्टेज कार्यक्रम र लाइभ दोहोरीमा समेत उनी निकै खोजिने बाल गायकमा पर्ने गरेका छन् । 

‘बिजुली’, ‘बिछोडको करौंतीले’, ‘ताराबाजी लै छोरा’ जस्ता केही गीतहरू गाएपछि सुप्रिम ‘द भ्वाइस किड्स नेपाल’को पहिलो सिजनमा सहभागी भएका थिए । त्यसपछि भने उनको स्वरको चर्चा हवात्तै बढेको हो ।

उनी ‘भ्वाइस किड्स’को फाइनलसम्म पुग्न सफल भए पनि विजेता भने बन्न सकेनन् । यद्यपि, उनलाई लिएर गीत रेकर्ड गराउनेहरूको संख्या बढ्दै गयो ।  

‘मेरो बाबा सुपरम्यान’, ‘देउरालीलाई भेटी’, ‘सम्झिराख है साथी’, ‘फोटो सिरानी’, ‘फोटो फिरिममा’, ‘रेलको बाटो’, ‘ओए काजल’, ‘फापरको पिठो’, ‘धोकेबाज हौ तिमी’ लगायतका थुप्रै गीतमा उनले स्वर दिएका छन् ।

यी मध्ये ‘फोटो फिरिममा’, ‘रेलको बाटो’, ‘ओए काजल’, ‘फापरको पिठो’, ‘धोकेबाज हौ तिमी’ सुप्रिमको स्वरमा चाइल्ड भर्सनमा सार्वजनिक भएका हुन् । 

चलचित्र ‘प्रेम गीत ३’को शीर्ष गीत ‘हर यूग होस्’ समेत सुप्रिमको स्वरको चाइल्ड भर्सनमा सार्वजनिक भएको छ ।

सुप्रिम बाजुरामा जन्मिएका हुन् । उनले बाबाआमाका साथ काठमाडौंमा बसेर अध्ययनसँगै संगीतलाई अगाडि बढाएका छन् ।

यतिबेला भने सुप्रिमले पढाइलाई ध्यान दिँदै केही समयलाई स्टेज कार्यक्रममा सहभागी नहुने बताएका छन् ।

आफ्नो आउँदै गरेको परीक्षालाई ध्यान दिँदै उनले चैत भरी स्टेज कार्यक्रममा सहभागिता नजनाउने बताएका हुन् ।