टोरोन्टो फिल्म फेस्टिबलमा वर्ल्ड प्रिमियर भएको नवीन सुब्बा निर्देशित चलचित्र ‘गाउँ आएको बाटो’को नेपाल रिलिज मिति सार्वजनिक गरिएको छ । ​निर्माणपक्षले शुक्रवार बिहान एक पोस्टर सार्वजनिक गर्दै रिलिज मिति घोषणा गरेको हो ।

चलचित्र आगामी वर्षको जेठ १८ गतेबाट प्रदर्शनमा आउने भएको छ । 

यो चलचित्रमा दयाहाङ राई, पशुपति राई तथा प्रसान राई प्रमुख भूमिकामा छन् । ‘नुमाफुङ’बाट प्रशंसा बटुलेका निर्देशक सुब्बाको यो तेस्रो चलचित्र हो । उनले बनाएको दोस्रो चलचित्र ‘गुडबाई काठमाडौं’ भने सार्वजनिक प्रदर्शनमा आएको छैन । टोरोन्टो फिल्म फेस्टिबलका अलावा बुसान फिल्म फेस्टिबलमा समेत प्रशंसा बटुलेको ‘गाउँ आएको बाटो’ले नवीन सुब्बालाई थप उचाइ प्रदान गर्ने विश्वास राखिएको छ । 

चलचित्रको पटकथा निर्देशक सुब्बाले महेश सुब्बासँगको सहकार्यमा लेखेका हुन् । मेन्छ्याम फिक्चर्स तथा बाँसुरी फिल्मसको संयुक्त ब्यानरमा निर्माण भएको चलचित्रका निर्माता अमोद राई र निर्देशक सुब्बा हुन् । 

चलचित्रले पूर्वी नेपालको हिमाली क्षेत्रमा बाँसको चोयाबाट डोका डालो बनाएर जीवनयापन गर्ने माइला(दया), माइली(पशुपति राई) र उनीहरूको सात वर्षे छोरा बिन्द्रे( प्रसान राई)को सो गाउँमा मोटरबाटो भित्रिएसँगै आएका आधुनिक परिवर्तनले ल्याउने उथलपुथल, संघर्षको कथा पेस गर्ने निर्माण पक्षले जनाएको छ ।