वैशाखको १४ गतेबाट प्रदर्शनमा आउने फिल्म ‘बोक्सीको घर’को फस्र्टलुक पोस्टर सार्वजनिक गरिएको छ । बुधवार सरस्वती पूजाको अवसर पारेर अभिनेत्री केकी अधिकारीको होम प्रोडक्सनमा निर्माण भएको यो फिल्मको पोस्टर सार्वजनिक गरिएको हो । 

सार्वजनिक पोस्टरमा रातको समयलाई प्रस्तुत गरिएको छ । एक महिला ठूलो पिपलको रुखतर्फ फर्किएर उभिएकी छिन् । अनुहार लुकाइएकी महिला रातो साडीमा कपाल फिजाएको अवस्थामा छिन् । पिपलको रुखमाथि ठूलो आकारमा पूर्णिमाको चन्द्रमालाई प्रस्तुत गरिएको छ । पोस्टरले दर्शकलाई कौतूहलता जगाउने देखिन्छ । फिल्मको नामसँग मिल्ने गरी बिम्बात्मक रुपमा डिजाइन गरिएको पोस्टर आकर्षक लाग्छ । 

‘बोक्सीको घर’मा मुख्य भूमिकामा केकी स्वयंमको अभिनय छ । उनका साथमा सुपला सापकोटा, श्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोला लगायतको पनि अभिनय रहेको फिल्मलाई सुलक्षण भारतीले निर्देशन गरेका हुन् ।

८ वर्षअघि मञ्चन भएको चर्चित नाटक ‘बोक्सीको घर’माथि रहेर यो फिल्म निर्माण भएको हो । नाटकलाई भारतीले नै लेखन एवं निर्देशन गरेका थिए । 

सोसल–थ्रिलर जनरामा निर्माण भएको फिल्मले समाजको कुप्रथालाई चित्रण गर्ने बताइएको छ । 

फिल्मको निर्मातामा केकीका बुबा बद्री अधिकारी छन् भने कार्यकारी निर्मातामा राज घिमिरे छन् । ​

शिवराम श्रेष्ठले खिचेको फिल्मलाई लोकेश बज्राचार्यले सम्पादन गरेका हुन् । नेपालसहित विभिन्न देशमा एकसाथ प्रदर्शनमा आउने फिल्मलाई अन्तर्राष्ट्रिय फेस्टिभलमा समेत लैजाने योजनामा निर्माण टिम छ ।