पूजा शर्माको शीर्ष भूमिका रहेको फिल्म ‘दान्भी’को प्रदर्शन मिति तय गरिएको छ । 

महाशिवरात्रि तथा अन्तराष्ट्रिय नारी दिवसको अवसर पारेर शुक्रवार फिल्मको रिलिज मिति घोषणा गरिएको हो । रुपेश तामाङको निर्देशनमा तयार भएको यो फिल्मलाई आउँदो वर्षको जेठ १० गतेबाट नेपालभर रिलिज गर्ने घोषणा निर्माणपक्षले गरेको छ । बुद्ध जयन्तीको सार्वजनिक विदा समेत भएकाले फिल्म बिहिबारबाट नै  रिलिज हुनेछ । 

एक्सनप्रधान यो फिल्ममा अभिनेत्री पूजा शर्मा केन्द्रीय भूमिकामा छिन् । फिल्मको टिजर सार्वजनिक भएपछि यसको चर्चा पनि चुलिएको थियो ।

फिल्मको छायांकन नेपाल र भारतमा गरिएको छ । 

देव मगर, अनुप गडाल निर्माता रहेको यो फिल्ममा पवन राना मगर कार्यकारी निर्माताको रुपमा छन् । फिल्ममा कमला लिम्बु, पन्चबहादुर तामाङ र आदर्श पौडेल सह–निर्माताको रुपमा छन् । यो फिल्ममा पूजाको जोडीको रुपमा कुन्साङ बोम्जनले अभिनय गरेका छन् । फिल्ममा किरण श्रेष्ठको पनि मुख्य भूमिका छ । 

लभ स्टोरी फिल्ममा रुचाइएकी अभिनेत्री पूजा शर्माले पहिलो पटक ‘दान्भी’मार्फत आफूलाई एक्सन लयमा उभ्याएकी हुन् ।