तिलगंगा आँखा प्रतिष्ठानद्वारा सञ्चालित 'तिलगंगा कञ्चनरूप सर्जिकल आँखा केन्द्र'ले सेवा शुरू गरेको एक वर्ष पुग्नै लाग्दा २ हजार ४०० भन्दा बढी नागरिकलाई आँखा उपचार सेवा प्रदान गरेको छ ।

गत वर्ष माघ १९ गते औपचारिक रूपमा उद्घाटन गरिएको यस अस्पतालले आँखा जाँच, चश्मा परामर्श, चश्मा निर्माण, र सामान्य शल्यक्रियासमेत उपलब्ध गराउँदै आएको छ ।

वार्षिक रूपमा सञ्चालन हुने निशुल्क आँखा शिविर यस वर्षदेखि आवधिक रूपमा सञ्चालन हुने योजना छ । मङ्सिरको दोस्रो हप्तामा आयोजित निशुल्क आँखा शिविरमा एक हजारभन्दा बढी व्यक्तिको आँखा जाँच गरिएको थियो ।

तीमध्ये ४०६ जनाको मोतिबिन्दुको शल्यक्रिया गरिएको आँखा केन्द्रका प्रमुख चन्द्रकान्त चौधरीले जानकारी दिए । शिविरका लागि तिलगंगा आँखा प्रतिष्ठान, काठमाडौँबाट विशेषज्ञ चिकित्सकहरूको टोली आउने गरेको छ ।

यस अस्पतालले स्वास्थ्य स्वयंसेविका र विद्यालयका शिक्षक-शिक्षिकाहरूलाई आँखा स्वास्थ्य सम्बन्धी तालिमसमेत प्रदान गरेको छ ।

अस्पतालका आँखा स्वास्थ्य कार्यकर्ता अनिल साउदका अनुसार हालै सम्पन्न दुई तालिममा ३० जना स्वास्थ्य स्वयंसेविका र ३३ जना शिक्षक-शिक्षिकालाई तालिम दिइएको थियो।

'तालिम प्राप्त गरेकाहरूले गाउँ र विद्यालयमा सामान्य आँखा जाँच गर्न थालेका छन्,' साउदले भने ।

तिलगंगा आँखा प्रतिष्ठान, कञ्चनरूप नगरपालिका र कृति सामुदायिक स्वास्थ्य उपचार केन्द्रको सहकार्यमा सञ्चालित यो अस्पतालले नयाँ नेतृत्व पाएको छ । वरिष्ठ नेत्र सहायक धर्मराज यादवले आजदेखि प्रमुखको जिम्मेवारी सम्हालेका छन् । पूर्वप्रमुख चन्द्रकान्त चौधरी सरूवा भई बिदा लिएका छन् ।

आइतवार आयोजित विदाई तथा स्वागत कार्यक्रममा कृति सामुदायिक स्वास्थ्य उपचार केन्द्रका अध्यक्ष अमर श्रेष्ठले चौधरीज्यूलाई कुशल सेवा प्रदान गरेकोमा धन्यवाद ज्ञापन गर्दै धर्मराज यादवलाई स्वागत गरे । \

रूपनगर क्याम्पसका प्रमुख प्राध्यापक दीपक कुमार गजुरेलले प्रतिष्ठानले गाउँलाई प्रदान गरिरहेको स्वास्थ्य सेवा विशिष्ट रहेको बताउँदै आगामी दिनमा अझ प्रभावकारी हुने विश्वास व्यक्त गरे ।