१० साउन २०८३, आइतबार
इजरायलले गाजातर्फ जाँदै गरेको एउटा सहायता जहाजलाई रोकेको छ । जसमा वातावरण अभियन्ता ग्रेटा थुनबर्ग र अन्य प्रमुख अभियन्ताहरू सवार थिए । सीएनएनका अनुसार जहाजमा रहेका सबैलाई इजरायल लगिएको छ र उनीहरूलाई हिरासतमा राखिएको छ ।
‘फ्रिडम फ्लीटिला कोअलिशन’ (एफएफसी) का अनुसार इजरायली सेनाले ‘म्याडलिन’ नामक जहाजमाथि हमला गरेर गैरकानुनी रूपमा कब्जा जमाएको हो ।
उक्त जहाज गाजामा सहायता पुर्याउन प्रयासरत थियो, जहाँ ६ सय दिनभन्दा बढीको युद्ध र ११ हप्तादेखिको इजरायली नाकाबन्दीले २१ लाखभन्दा बढी मानिसलाई भोकमरीको गहिरो संकटमा धकेलेको छ।
म्याडलिन जहाजमा सवारमध्ये वातावरण अभियन्ता ग्रेटा थुनबर्ग र फ्रान्सकी युरोपेली सांसद रिमा हसन पनि परेका छन् ।
इजरायली परराष्ट्र मन्त्रालयले सोमबार बिहान सामाजिक सञ्जाल एक्समा लेख्दै भनेको छ, ‘उक्त जहाज सुरक्षित रूपमा इजरायली किनारातर्फ ल्याइँदैछ । यात्रुहरू चाँडै आफ्ना देश फर्काइने अपेक्षा गरिएको छ ।’
परराष्ट्र मन्त्रालयले पोस्ट गरेको भिडियोमा म्याडलिनको चालक दलका सदस्यहरू सुन्तला रंगको लाइफ ज्याकेट लगाएर बसिरहेको देखिन्छ । एकजना सैनिकले तिनीहरूलाई बोतलमा पानी र प्लास्टिकमा प्याक गरिएको स्यान्डविच दिइरहेका छन् । ग्रेटा थुनबर्ग अगाडिको पंक्तिमा बसेकी देखिन्छिन् ।
जहाजबाट प्रत्यक्ष प्रसारण गरिएको एउटा भिडियोमा अभियन्ता यासमिन अकारले डेकमा सेतो पदार्थ देखाउँदै त्यसलाई जहाजमाथि खसालिएको बताइन् । केही समयपछि उनले उक्त पदार्थले आफ्नो आँखा जलिरहेको सुनाइन् ।
एफएफसी समूहले टेलिग्राममा अर्को भिडियो पनि पोस्ट गरेको थियो, जसमा जहाजभित्र चालक दलका सदस्यहरू हात उठाएर बसेका देखिन्छन्।
जहाजसँगको सम्पर्क टुटेपछि, एफएफसीले ग्रेटा थुनबर्ग र अन्य सवार व्यक्तिका पूर्वरेकर्ड गरिएका भिडियो सन्देश पोस्ट गर्न थाल्यो। तीमध्ये एक भिडियोमा थुनबर्गले भनेकी छन्, ‘यदि तपाईंले यो भिडियो हेर्नुभएको छ भने, हामीलाई अन्तर्राष्ट्रिय पानी क्षेत्रमा इजरायली कब्जा शक्तिले रोक्ने वा अपहरण गर्ने काम गरिसकेको छ ।’
एफएफसीले जारी गरेको एक विज्ञप्तिमा भनिएको छ, ‘इजरायलले पूर्ण उन्मुक्तिमा कार्य गरिरहेको छ । जहाजमा भएको बच्चाहरूको दूध, खाद्यान्न र औषधि सामग्रीसमेत जफत गरिएको छ ।’
इजरायलले भने ती सामग्रीहरूलाई मानवीय च्यानलमार्फत गाजा पुर्याइने दाबी गरेको छ । इजरायलले पटकपटक यो सहायता जहाजलाई गाजामा पुग्न नदिने बताउँदै आएको थियो । उक्त जहाजलाई ‘सेलिब्रिटी चढेको सेल्फी याट’ भन्दै प्रचार गर्दै आएको थियो ।
‘इजरायलसँग अन्तर्राष्ट्रिय स्वयंसेवकहरूलाई म्याडलिन जहाजमा हिरासतमा लिने कुनै कानूनी अधिकार छैन’, मानवअधिकार अधिवक्ता तथा फ्रीडम फ्लीटिला आयोजक हुवैदा आराफले भनेका छन्, ‘ यो जबर्जस्ती कब्जा अन्तर्राष्ट्रिय कानूनको स्पष्ट उल्लंघन हो र गाजामा मानवीय सहायता पहुँच सुनिश्चित गर्न अन्तर्राष्ट्रिय अदालतले दिएको आदेशको अवहेलनासमेत हो ।’
