२८ जेठ २०८३, बिहीबार
यूएईको दुबईस्थित अल नासर क्लबमा आइतबार हुने सांगीतिक कार्यक्रम ‘गोर्खा साँझ’का लागि गायक कुमा सागर दुबई पुगेका छन्। उनीसहित ख्वप ब्यान्डको टोली शनिबार दुबई पुगेको हो ।
दिउँसो १ बजेदेखि बेलुकी ८ बजेसम्म सञ्चालन हुने उक्त कार्यक्रममा ख्वप ब्यान्डका साथै अन्य कलाकारहरूको पनि प्रस्तुती रहनेछ ।
कार्यक्रम गैरआवासीय नेपाली संघ (एनआरएनए) यूएईका उपाध्यक्ष भीम मल्ल ठकुरीको संयोजनमा हुन लागेको हो। ठकुरीले ‘गोर्खा साँझ’लाई नेपाली प्रवासी समुदायको भावना, पहिचान र एकताको उत्सवका रूपमा आयोजना गरिएको जानकारी दिए।
ख्वप ब्यान्डमा शरद देउला, सिद्धि सागर प्रजापति, रोशन बज्राचार्य, सुमन गैडा, प्रबिन लाखु, रोशिक जाधरी, अमन माली, बीके प्रजापति, रोज महर्जन र रामसुन्दर धुसुजस्ता कलाकारहरू सहभागी छन्।
यसैगरी नेपालबाटै ममता राणा र मोहन खड्काको पनि विशेष प्रस्तुति रहनेछ छ । यस्तै दुबईस्थित नेपाली कलाकारहरू सुमन गैडा, प्रदीप गुरुङ, समीर स्याङ्बो, युवराज थापा, सागर तामाङ, आशीष अवाले लगायतले पनि आफ्नो प्रस्तुति दिने कार्यक्रम सहसंयोजक अनिल गुरुङले जानकारी दिए ।
कार्यक्रममा करिब ४ हजार दर्शकको सहभागिता रहने बताइएको छ ।
