कालिमाटी फलफूल तथा तरकारी बजार विकास समितिले सोमबारका लागि कृषि उपजहरूको नयाँ मूल्यसूची सार्वजनिक गरेको छ । सार्वजनिक विवरणअनुसार आजको बजारमा कुरीलो सबैभन्दा महँगो वस्तुको रूपमा देखिएको छ भने केही मौसमी तरकारीको मूल्यमा सामान्य वृद्धि भएको छ ।
समितिका अनुसार आज कुरीलोको अधिकतम मूल्य प्रतिकिलो १,२०० रुपैयाँ कायम भएको छ । त्यस्तै, मसला र जडिबुटीजन्य वस्तुहरूमा पार्सले प्रतिकिलो ७०० रुपैयाँ र पुदीना ५०० रुपैयाँसम्म पुगेको छ । सिताके च्याउ र सुकेको माछाको अधिकतम मूल्य पनि प्रतिकिलो १,००० रुपैयाँ तोकिएको छ ।
भान्सामा दैनिक प्रयोग हुने गोलभेडाको मूल्यमा पनि विविधता देखिएको छ । नेपाली ठूलो गोलभेडा प्रतिकिलो १०० रुपैयाँ र भारतीय ठूलो गोलभेडा १२० रुपैयाँमा कारोबार भइरहेको छ । यस्तै, सानो लोकल गोलभेडा ९० रुपैयाँ र टनेलको गोलभेडा ११० रुपैयाँसम्म पुगेको छ । रातो आलुको अधिकतम मूल्य ४० रुपैयाँ र भारतीय सुकेको प्याजको मूल्य ५५ रुपैयाँ कायम गरिएको छ ।
सागसब्जी तर्फ रायोको साग प्रतिकिलो ६० रुपैयाँ, पालूगो, चमसुर र मेथीको सागको अधिकतम मूल्य १३० रुपैयाँ रहेको छ । हरियो प्याज ६० रुपैयाँ र जिरीको साग २५० रुपैयाँमा बिक्री भइरहेको छ । जाडो मौसमको रोजाइमा पर्ने मटरकोशाको मूल्य १३० रुपैयाँ, सिमी (राजमा) १५० रुपैयाँ र भिण्डी १३० रुपैयाँसम्म पुगेको छ ।
फलफूलतर्फ स्याउ (फूजी) ३२० रुपैयाँ र झोले स्याउ २५० रुपैयाँ प्रतिकिलोमा उपलब्ध छ । केरा प्रतिदर्जन २०० रुपैयाँमा बिक्री भइरहँदा सुन्तला १२०, किवि २५० र आभोकाडो ३५० रुपैयाँसम्म पुगेको समितिले जनाएको छ । तराईको मेवा १०० रुपैयाँ र नेपाली मेवा ७० रुपैयाँ प्रतिकिलोमा कारोबार भइरहेको छ ।
यसैगरी, माछा बजारमा रहु माछाको अधिकतम मूल्य ३४० रुपैयाँ र बचुवा माछा २८० रुपैयाँ कायम गरिएको छ । मसलाजन्य सामग्रीमा सुकेको खुर्सानी ४४० रुपैयाँ, चिनियाँ लसुन ३५० रुपैयाँ र नेपाली लसुन २५० रुपैयाँसम्म पुगेको छ । अदुवाको मूल्य भने प्रतिकिलो ८० रुपैयाँमा स्थिर रहेको कालिमाटी फलफूल तथा तरकारी बजार विकास समितिले जनाएको छ ।