आफ्नै श्रीमतीको विभत्स हत्या गरी तीन वर्षदेखि फरार रहेका एक अभियुक्तलाई जाजरकोट प्रहरीले पक्राउ गरेको छ । जाजरकोटको छेडागाड नगरपालिका वडा नं. १३ पिपलतडाका भद्र बहादुर सुनारलाई प्रहरीले नियन्त्रणमा लिएको हो ।

२०७९ साल मंसिर १० गते भद्र बहादुरले आफ्नी ३४ वर्षीया श्रीमती पानसरा सुनारलाई बन्चरो र खुकुरी प्रहार गरी हत्या गरेका थिए । श्रीमतीको हत्या गरेलगत्तै उनी फरार भएका थिए । त्यसयता प्रहरीले उनलाई पक्राउ गर्न प्राविधिक विश्लेषणसहित सादा पोसाकमा विशेष टोली परिचालन गरी निरन्तर खोजी गरिरहेको थियो ।
लामो समय बाहिर लुकिछिपी बसेका सुनार दुई–तीन दिनअघि मात्र आफ्नो गाउँघरमा आएर बसेको विशेष सूचना प्रहरीले प्राप्त गरेको थियो । सोही सूचनाका आधारमा जिल्ला प्रहरी कार्यालय जाजरकोटबाट खटिएको टोलीले खोजतलास गर्ने क्रममा उनलाई गत पुस २० गते दिउँसो पिपलतडाबाट कार्कीगाउँ जाने सडक खण्डमा फेला पारी पक्राउ गरेको हो ।
जिल्ला प्रहरी कार्यालय जाजरकोटका सूचना अधिकारी एवं प्रहरी निरीक्षक सुधिर कुमार खड्काका अनुसार पक्राउ परेका सुनारलाई सोमबार जाजरकोट जिल्ला अदालतमा उपस्थित गराइएको छ । अदालतबाट ‘कर्तव्य ज्यान’ मुद्दामा अनुसन्धानका लागि ७ दिनको म्याद थप गरी उनलाई हिरासतमा राखिएको छ ।
प्रहरीले घटनाको सम्बन्धमा थप अनुसन्धान प्रक्रिया अगाडि बढाइएको जनाएको छ ।