०४ असार २०८३, बिहीबार
झापाको भद्रपुर नगरपालिका-१० त्रिवेणी टोलमा एक वृद्धको सिरिन्ज प्रहार गरी हत्या भएको छ । बिहीबार साँझ करिब ६:२० बजेको समयमा ६६ वर्षीय खेमराज ढकालको आफ्नै घरमा हत्या भएको हो ।
प्रहरीका अनुसार हत्यामा संलग्न रहेको आरोपमा २६ वर्षीय दिपेश कुमार सिंहलाई घटनास्थलबाटै नियन्त्रणमा लिइएको छ । सिरहाको विष्णुपुर गाउँपालिका-१ स्थायी घर भएका सिंह सुनसरीको धरानस्थित बीपी कोइराला स्वास्थ्य विज्ञान प्रतिष्ठान (घोपा)मा एमबीबीएस चौथो वर्षमा अध्ययनरत विद्यार्थी हुन् ।
मृतक ढकाल बिहीबार साँझ आफ्नो परिवारसँग घरमा बसिरहेको अवस्थामा अभियुक्त सिंहले आफूसँगै ल्याएको रसायन (केमिकल)लोड गरिएको सिरिन्जले ढकालको घाँटीमा अचानक प्रहार गरेका थिए । सिरिन्ज प्रहारबाट गम्भीर घाइते भएका ढकाललाई तत्काल उपचारका लागि भद्रपुरस्थित ओमसाई पाथीभरा अस्पताल लगिएको थियो । अस्पताल पुर्याउनासाथ चिकित्सकले उनलाई मृत घोषणा गरेका थिए ।
सिरिन्जमा प्रयोग गरिएको तरल पदार्थमा कुन कुन घातक तत्व मिसाइएको थियो भन्नेबारे प्रयोगशाला (ल्याब)परीक्षणपछि मात्रै खुल्ने जिल्ला प्रहरी कार्यालय झापाका प्रहरी नायव उपरीक्षक खगेन्द्र खड्काले बताए ।
अनुसन्धानका क्रममा अभियुक्त सिंह सोही दिन बिहान पनि मृतकको घर पुगेको खुलेको छ । उनले बिहान अवकाश प्राप्त शिक्षक चाहिएको छ, खोजिदिनुपर्यो भन्दै बहाना बनाएर ढकालको घर पत्ता लगाएको बुझिएको खड्काले बताए ।
मृतककी छोरी पनि बीपी कोइराला स्वास्थ्य विज्ञान प्रतिष्ठानमै एमबीबीएस तेस्रो वर्षमा अध्ययनरत छिन् । अभियुक्त र मृतककी छोरीबीच सामान्य चिनजान रहेको भए तापनि ८–९ महिनादेखि उनीहरूबीच विवाद रहेको पाइएको छ ।
पीडित पक्षका अनुसार ८–९ महिनाअघि सिंहले मृतककी छोरीको चरित्र हत्या गर्ने नियतले फोटो सम्पादन (इडिट) गरी पठाउने र मानसिक तनाव दिने गरेका थिए । सो सम्बन्धमा पीडित परिवारले इलाका प्रहरी कार्यालय धरानमा सिंहविरुद्ध उजुरी समेत दर्ता गराएका थिए । सोही पुरानो रिसइबीका कारण सिंहले योजनाबद्ध रूपमा बुवाको हत्या गरेको हुन सक्ने प्रहरीको प्रारम्भिक अनुमान छ ।
घटनालगत्तै खटिएको जिल्ला प्रहरी कार्यालय झापाको टोलीले अभियुक्त सिंहलाई पक्राउ गरेको छ । उनीविरुद्ध मुलुकी अपराध संहिता २०७४ को ‘ज्यान सम्बन्धी कसुर’ अन्तर्गत मुद्दा दर्ता गरी थप अनुसन्धान प्रक्रिया अगाडि बढाइएको प्रहरीले जनाएको छ ।
