१५ असार २०८३, सोमबार
राजविराजमा सुरु भएको प्रधानमन्त्री कप एकदिवसीय प्रदेशस्तरीय क्रिकेट छनोट प्रतियोगिता (पुरुष) अन्तर्गत आज सम्पन्न खेलमा महोत्तरीले उत्कृष्ट प्रदर्शन गर्दै धनुषामाथि ६० रनको प्रभावशाली जित दर्ता गरेको छ । प्रतियोगितामा महोत्तरीको यो पहिलो जित हो ।
सप्तरी क्रिकेट सङ्घको आयोजनामा सञ्चालन भइरहेको प्रतियोगिताअन्तर्गत भएको खेलमा टस जितेर धनुषाले पहिले फिल्डिङ रोज्दै महोत्तरीलाई ब्याटिङको निम्तो दिएको थियो । ब्याटिङको अवसर पाएको महोत्तरीले संयमित प्रदर्शन गर्दै ४७ ओभर ३ बलमा सबै विकेट गुमाएर १६७ रनको प्रतिस्पर्धात्मक योगफल खडा गरेको थियो ।
महोत्तरीका लागि आदित्य मण्डल र राजकुमार सहनीले समान २७÷२७ रनको योगदान दिए । श्याम मण्डलले २२ रन बनाउँदा अभिषेक तिवारीले १४ रन जोडेका थिए । अन्य खेलाडीले सानो–सानो योगदान गरेपछि महोत्तरीले सम्मानजनक स्कोर बनाउन सफल भएको थियो । बलिङतर्फ धनुषाका अभिजित मण्डलले २ विकेट लिन सफल हुँदा अखिलेश ठाकुरले १ विकेट झारेका थिए ।
१६८ रनको लक्ष्य पछ्याउँदै मैदान उत्रिएको धनुषाले भने अपेक्षाअनुसार प्रदर्शन गर्न सकेन । महोत्तरीका बलरहरूको कसिलो बलिङका कारण धनुषा २७ ओभर १ बलमै सबै विकेट गुमाएर मात्र १०७ रनमा सीमित हुन पुगेको थियो । धनुषाका लागि मयन यादवले सर्वाधिक ३९ रन बनाए ।
श्याम रायले १७ रन र रूपेश यादवले १५ रन बनाउनुबाहेक अन्य खेलाडीले दोहोरो अङ्क पार गर्न सकेनन् । महोत्तरीको जितमा रमेश सहनीले उत्कृष्ट बलिङ प्रदर्शन गरेका थिए । उनले ९ ओभर बलिङ गर्दै २ मेडन राखी मात्र २५ रन खर्चेर ४ विकेट हात पारे । आकाश मण्डलले ३ विकेट लिए भने अभिषेक तिवारी १ विकेट लिन सफल भए । उत्कृष्ट प्रदर्शन गरेका महोत्तरीका रमेश सहनी खेलको ‘प्लेयर अफ द म्याच’ घोषित भएको सप्तरी क्रिकेट सङ्घका सचिव चन्दनकुमार यादवले जानकारी दिए ।
उनलाई सप्तरी क्रिकेट सङ्घका सदस्य वीरेन्द्रकुमार यादवले नगद एक हजार ५०० सहित ट्रफी प्रदान गरेका थिए । प्रतियोगिताअन्तर्गत शनिबार धनुषा र महोत्तरीबीच पुनःप्रतिस्पर्धा हुने तालिका रहेको छ । प्रतियोगिताबाट छनोट भएका खेलाडीहरूले आगामी प्रधानमन्त्री कप राष्ट्रिय क्रिकेट प्रतियोगितामा सहभागिता जनाउने छन् ।
