भारतसँग सीमा जोडिएका बाँके जिल्लाका नाकाहरू बन्द हुने भएका छन् ।

यही फागुन २१ गते हुने प्रतिनिधिसभा निर्वाचनलाई स्वतन्त्र, निष्पक्ष, भयरहित र विश्वसनीय वातावरणमा सम्पन्न गर्नका उक्त नाकाहरू बन्द गर्न लागिएको जिल्ला प्रशासन कार्यालय बाँकेले जनाएको छ ।

बाँकेका सहायक प्रमुख जिल्ला अधिकारी महेशकुमार गुरुङ बुधबार सूचनामार्फत फागुन १८ देखि २१ गतेसम्म उक्त नाकाहरू बन्द हुने जानकारी दिएका हुन् ।

'फागुन २१ गते हुने प्रतिनिधिसभा सदस्य निर्वाचन, २०८२ लाई स्वतन्त्र, निष्पक्ष, भयरहित र विश्वसनीय वातावरणमा सम्पन्न गर्नका लागि भारतसँग सीमा जोडिएका बाँके जिल्लाका सम्पूर्ण सीमा नाकाहरू मिति २०८२/११/१८ गते (२ मार्च २०२६) सोमबार राति १२ बजेदेखि २०८२/११/२१ गते (५ मार्च २०२६) बिहीबार राति १२ बजेसम्म बन्द रहने बेहोरा सम्बन्धित सबैको जानकारीको लागि अनुरोध गरिन्छ,' सहायक प्रमुख जिल्ला अधिकारी गुरुङद्वारा जारी सूचनामा भनिएको छ ।