विश्वकै सर्वाधिक लोकप्रिय फ्रेन्चाइज क्रिकेट प्रतियोगिता इन्डियन प्रिमियर लिग (आईपीएल)को जारी सिजनमा आधाभन्दा बढी खेल सकिएको छ ।

१४ मध्ये अधिकांश टोलीले आठ र केही टोलीले १० खेल खेलिसकेका छन् । अंक तालिकाको माथिल्लो चारभित्र पर्दै प्ले–अफ चरणमा पुग्न पनि टोलीहरूबीच चर्को प्रतिस्पर्धा देखिएको छ ।

आठ खेल सकेको पञ्जाब किङ्स १३ अंकसहित पहिलो र नौ खेल खेलेको साविक विजेता रोयल च्यालेन्जर्स बेंगलुरु १२ अंकसहित दोस्रो स्थानमा छन् ।

यसैगरी, नौ खेल सकेको सनराइजर्स हैदराबाद १२ अंकसहित तेस्रो, १० खेल खेलेको राजस्थान रोयल्स १२ अंकसहित चौथो र नौ खेल सकेको गुजरात टाइटन्स १० अंकसहित पाँचौँ स्थानमा छन् ।

नौ खेल खेलेको दिल्ली क्यापिटल्स आठ अंकसहित छैटौँ स्थानमा छ । खासगरी, यी टोलीहरूबीच नै प्ले–अफ चरणमा पुग्न कडा प्रतिस्पर्धा देखिएको छ ।

यहाँ चर्चा गर्न लागिएको विषय भने केही फरक छ । यो सिजनको आईपीएल अम्पायरहरूको विवादित निर्णयका कारण पनि चर्चामा रहेको छ ।

आईपीएलजस्तो लोकप्रिय प्रतियोगितामा अम्पायरको सानोभन्दा सानो गलत निर्णय पनि चर्चामा आउनु स्वाभाविक पनि हो । यस्ता गलत निर्णयले खेलको नतिजामा समेत गहिरो प्रभाव पार्ने गर्छ ।

हालै सम्पन्न खेलमा पनि जासन होल्डरले रजत पाटिदारको क्याच लिएका थिए । अम्पायरले पाटिदारलाई आउट पनि दिए ।

तर, पछि रिप्लेमा हेर्दा होल्डरले क्याच लिनुअघि नै बलले भुइँ छोइसकेको देखिएको थियो । यस्तै केही अम्पायरका विवादित निर्णयका बारेमा यहाँ चर्चा गरिएको छ :

अंगकृष रघुवंशीको रन आउटले जन्माएको विवाद

लखनउ सुपर जायन्ट्स र कोलकाता नाइट राइडर्सबीचको खेलमा अंगकृष रघुवंशी रन आउट भएका थिए । अम्पायरले पनि उनलाई आउट दिएका थिए ।

त्यो रन आउटमा अम्पायरले 'अब्स्ट्राक्टिङ द फिल्ड' नियमलाई गलत प्रयोग गरेको आरोप लाग्दै आएको छ ।

खासमा, मोहम्मद शामीले फालेको बल स्टम्पमा लाग्नुअघि रन लिन दौडिरहेका रघुवंशीको शरीरमा ठोक्किएको थियो ।

तर, रघुवंशीले जानेर बललाई रोक्ने प्रयास गरेका थिएनन् । तर, अम्पायरले भने 'अब्स्ट्राक्टिङ द फिल्ड' नियम लागू गर्दै रघुवंशीलाई आउट घोषित गरेका थिए ।

अम्पायरको यो निर्णयलाई लिएर निकै विवाद भएको थियो । समर्थकहरूले पनि सामाजिक सञ्जालमा व्यापक असन्तुष्टि व्यक्त गरेका थिए ।

यस विषयमा अम्पायरको निर्णयविरुद्ध उजुरी पनि परेको थियो । तर, एमसीसीले भने अम्पायरको निर्णयलाई नै सही ठहर्‍याएको थियो ।

जासन होल्डरको विवादित क्याच

रोयल च्यालेन्जर्स बेंगलुरु र गुजरात टाइटन्सबीचको खेलमा रजत पाटिदारको क्याचलाई लिएर पनि निकै विवाद भएको थियो ।

रजत पाटिदारले खेलेको सट हावामा निकै माथि गएको थियो । फिल्डिङ गरिरहेका जासन होल्डरले दौडिएर डाइभ लगाउँदै क्याच लिएका थिए ।

अम्पायरले पनि पाटिदारलाई क्याच आउट घोषित गरेका थिए । तर, पछि भिडियो रिप्लेमा होल्डरले क्याच लिनुअघि नै बलले जमिन छोइसकेको देखिएको थियो ।

यतिसम्म कि होल्डर क्याच लिएर उठ्दासमेत बलले भुइँ छोइरहेको थियो । यो विवादास्पद क्याचको पनि ठुलै चर्चा भएको थियो ।

जब दिग्वेश राठीको खुट्टाले बाउन्ड्री लाइन छोयो

कोलकाता नाइट राइडर्स र लखनउ सुपर जायन्ट्सबीचको खेलका क्रममा यो घटना भएको थियो । उक्त खेलमा फिन एलनको विकेट निकै विवादित बनेको थियो ।

प्रिन्स यादवको बलमा फिन एलनले छक्का प्रहार गर्ने प्रयास गरेका थिए । तर, बाउन्ड्री लाइननजिक फिल्डिङ गरिरहेका दिग्वेश राठीले फिन एलनको क्याच लिए ।

अम्पायरले पनि फिन एलनलाई क्याच आउट घोषित गरे । पछि भिडियो रिप्लेमा हेर्दा क्याच लिँदाको क्षणमा दिग्वेश राठीको खुट्टाले बाउन्ड्री लाइन छोएको स्पष्ट देखिएको थियो ।

त्यसपछि अम्पायरको निर्णयलाई लिएर निकै विवाद भएको थियो । सामाजिक सञ्जालमा पनि समर्थकले अम्पायरको निर्णयको चर्को आलोचना गरेका थिए ।

जब अम्पायरले 'नो बल' देखेनन्

चेन्नई सुपर किङ्स र गुजरात टाइटन्सबीचको खेलका क्रममा यो घटना भएको थियो । ग्राउन्ड अम्पायरबाट समय समयमा यस्तो गल्ती हुन्छ ।

तर, त्यसलाई सच्याउने जिम्मेवारी टीभी अम्पायरको काँधमा पनि हुन्छ । उक्त खेलमा तीव्रगतिका बलर अरशद खानले स्पष्ट रूपमा 'नो बल' फालेका थिए ।

तर, अम्पायरले 'नो बल' फालेको थाहा पाएनन् । टीभी अम्पायरले पनि यसमा कुनै प्रतिक्रिया दिएनन् । अरशद खानको उक्त बलमा जामी आभरटनले चौका प्रहार गरेका थिए ।

तर, पछि टीभी रिप्लेमा हेर्दा अरशद खानले 'नो बल' फालेको स्पष्ट रूपमा देखिएको थियो । त्यसपछि यो निर्णयको पनि व्यापक आलोचना भएको थियो ।

वास्तवमै नटआउट थिए त हेनरिक क्लासेन ?

जारी सिजनको आईपीएलको पहिलो खेल रोयल च्यालेन्जर्स बेंगलुरु र सनराइजर्स हैदराबादबीच खेलिएको थियो ।

त्यो खेलमा हेनरिक क्लासेनले बाउन्ड्री प्रहार गर्ने प्रयास गरेका थिए । तर, बाउन्ड्री लाइननजिकै फिल्डिङ गरिरहेका फिल साल्टले क्लासेनको क्याच लिए ।

अम्पायरले पनि क्लासेनलाई क्याच आउट घोषणा गरेका थिए । तर, पछि टीभी रिप्लेमा हेर्दा क्याच लिँदाको क्षणमा फिल साल्टको खुट्टाले बाउन्ड्री लाइन छोएको स्पष्ट देखिएको थियो ।

खासमा अम्पायरले त्यो बललाई छक्का दिनुपर्ने थियो । तर, उनले क्लासेनलाई क्याच आउट घोषित गरे । अम्पायरको त्यो निर्णयको पनि निकै आलोचना भएको थियो ।