बलियो आन्तरिक मागका कारण भारतको सेवा क्षेत्रको वृद्धिदर अप्रिल महिनामा पुनः उत्साहजनक रूपमा बढेको छ । मार्चमा १४ महिनाकै न्यून विन्दुमा झरेको सेवा क्षेत्रको गतिविधि अप्रिलमा सुधारिएको बुधबार सार्वजनिक एक सर्वेक्षणले देखाएको रोयटर्सले जनाएको छ । 

विश्वव्यापी मागमा आएको गिरावटका बावजुद आन्तरिक बजारको सुदृढ प्रदर्शनले समग्र क्षेत्रलाई गति प्रदान गरेको समाचारमा उल्लेख छ । यद्यपि, मध्यपूर्वमा बढ्दो अनिश्चितताका कारण आगामी वर्षका लागि व्यवसायीहरूको आशावादितामा भने केही कमी आएको छ ।

एस एण्ड पी ग्लोबलद्वारा संकलित एचएसबीसी इन्डिया सर्भिसेज पर्चेजिङ म्यानेजर्स इन्डेक्स मार्चको ५७.५ बाट बढेर अप्रिलमा ५८.८ पुगेको छ । यो तथ्याङ्क प्रारम्भिक अनुमान गरिएको ५७.९ भन्दा पनि बढी हो । 

सन् २०२१ को मध्यदेखि नै यो सूचकांक वृद्धि र संकुचन छुट्ट्याउने ५०.० को अंकभन्दा माथि रहँदै आएको छ । मागको प्रमुख मापन मानिने नयाँ व्यवसायको वृद्धिदर अप्रिलमा पछिल्लो पाँच महिनाकै तीव्र गतिमा देखिएको छ । यस विस्तारमा उपभोक्ता सेवा क्षेत्रले नेतृत्व गरेको छ भने यातायात, सूचना तथा सञ्चार क्षेत्रले त्यसलाई पछ्याएका छन् ।

अन्तर्राष्ट्रिय बिक्रीको पक्षमा भने केही सुस्तता देखिएको छ । विदेशी मागमा आएको यो गिरावट पछिल्लो एक वर्षभन्दा बढी समययताकै दोस्रो न्यून स्तर हो । सेवा प्रदायक कम्पनीहरूले यस सुस्तताको मुख्य कारण मध्यपूर्वको युद्ध र घट्दो विदेशी पर्यटक आवागमनलाई मानेका छन् । सञ्चालन खर्चतर्फ भने अप्रिलमा केही राहत महसुस गरिएको छ । मार्चमा झन्डै चार वर्षकै उच्च विन्दुमा पुगेको खर्च वृद्धिदर अप्रिलमा केही मत्थर भएको छ, तर खाद्य सामग्री, ग्यास र श्रम लागत महँगो हुँदा अझै पनि दबाब कायमै रहेको देखिन्छ ।

लागत वृद्धि भए पनि कम्पनीहरूले सेवा शुल्कमा भने खासै ठूलो भार थपेका छैनन् । बिक्री मूल्यमा भएको सामान्य वृद्धि पछिल्लो तीन महिनाकै सबैभन्दा सुस्त पाइएको छ, जसको अर्थ कम्पनीहरूले अतिरिक्त लागतको भार आफैँले व्यहोरिरहेका छन् । नयाँ व्यवसायको बढ्दो चापलाई धान्नका लागि कम्पनीहरूले अल्पकालीन कर्मचारी र कनिष्ठ प्रशिक्षार्थीहरूको भर्नामा तीव्रता दिएका छन्।