अख्तियार दुरुपयोग अनुसन्धान आयोगका प्रमुख आयुक्त प्रेमकुमार राई लगायतलाई ज्यान मार्ने धम्की दिएको आरोपमा पक्राउ परेका प्रकाश पाठकलाई अदालतले पुर्पक्षका लागि कारागार पठाएको छ ।

काठमाडौं जिल्ला अदालतका न्यायाधीश सुदर्शन लामिछानेको एकल इजलासले पाठकलाई मुलुकी फौजदारी कार्यविधि संहिता, २०७४ को दफा ८० बमोजिम थुनुवा पूर्जी दिएर कारागार चलान गर्न आदेश दिएको हो ।

पाठकविरुद्ध आपराधिक षडयन्त्र, आपराधिक लाभ (एक्सटर्सन), हुण्डी, विद्युतीय कारोबार र संगठित अपराधको कसुरमा जिल्ला अदालतमा मुद्दा दर्ता भएको थियो । 

शुक्रबार काठमाडौं जिल्ला अदालतमा भएको थुनछेक बहसमा न्यायाधीश लामिछानेले पाठकलाई पुर्पक्षका लागि कारागार चलान गर्ने आदेश दिएका हुन् ।

पाठकले इमेलबाट अख्तियार प्रमुख राईसहित १० जनालाई ज्यान मार्ने धम्की दिएका थिए । पाठकले एक्ट्रिमिष्ट ग्रुप नेपाल नाम गरेको अवैधानिक संगठनको स्थापना गरेर नेपाल नागरिक उड्डयन प्राधिकरणका तत्कालीन महानिर्देशक प्रदीप अधिकारीको निर्देशनमा राईलाई ज्यान मार्ने धम्की दिएका अनुसन्धानबाट खुलेको थियो । 

त्यतिमात्रै होइन, बयानमा पाठकले आफूलाई राईलाई ज्यान मार्ने धम्की दिएबापत अधिकारीले फिलिपिन्समा हुण्डीमार्फत् दुई करोड रूपैयाँ दिएको बयानमा स्वीकारेका थिए । 

पाठकले अख्तियारका तत्कालीन सहप्रवक्ता गणेशबहादुर अधिकारीको मोबाइलमा भारतीय नम्बरबाट सन्देश पठाउँदै असम्बन्धित व्यक्ति पक्राउ गरेर दु:ख दिएको भन्दै ज्यान लिने धम्की दिएका थिए ।

अदालतले अभियोगपत्रमा समेटिएको तथ्य प्रमाणलाई आधार मानेर पाठकलाई पुर्पक्षका लागि कारागार चलान गरेको हो ।

आदेशमा फरारको हकमा म्याद जारी गर्न, डिल्लीबजार कारागारमा थुनामा रहेका प्रदीप अधिकारीको हकमा बयानका लागि झिकाई इजलासमा पेस गर्न भनिएको छ ।