वैदेशिक रोजगारीमा आकर्षक तलबको प्रलोभनमा पारी विभिन्न देश पठाइदिन्छु भन्दै रकम ठगी गरेको आरोपमा ७ जनालाई प्रहरीले पक्राउ गरेको छ ।

पक्राउ पर्नेमा काठमाडौं टोखा नगरपालिका-२ बस्ने नुवाकोट घर भएकी ४६ वर्षीया शारदा कुमारी अधिकारी, कास्की पोखरा महानगरपालिका-३२ बस्ने २९ वर्षीया सुनिता सुवेदी तिवारी, भक्तपुर सूर्यविनायक नगरपालिका-२ बस्ने इलाम घर भएकी ३५ वर्षीया सावित्रा देवी अर्याल रहेका छन् ।

यसैगरी, रूपन्देही सिद्धार्थनगर नगरपालिका-१ बस्ने ४३ वर्षीय ऋषि राम पाण्डे, ३६ वर्षीया अनिता पाण्डे, सोही नगरपालिका-१ बस्ने पाल्पा घर भएकी ३५ वर्षीया अम्बिका घिमिरे र ललितपुर महालक्ष्मी नगरपालिका-१० बस्ने महोत्तरी घर भएका २२ वर्षीय योगेश कुमार यादव पनि पक्राउ परेका छन् ।

पक्राउ परेकामध्ये शारदाले अष्ट्रेलिया पठाइदिन्छु भन्दै १ जनाबाट ६ लाख रूपैयाँ, सुनिताले जापान पठाइदिन्छु भन्दै १ जनाबाट ४ लाख रूपैयाँ, सावित्राले रोमानिया पठाइदिन्छु भन्दै १ जनाबाट १३ लाख रूपैयाँ, ऋर्षि रामले क्यानडा पठाइदिन्छु भन्दै १ जनाबाट १ लाख रूपैयाँ असुलेका थिए ।

यस्तै, अनिताले क्यानडा पठाइदिन्छु भन्दै १ जनाबाट २ लाख रूपैयाँ, अम्बिकाले क्यानडा पठाइदिन्छु भन्दै १ जनाबाट २ लाख ८० हजार रूपैयाँ र योगेशले ग्रीस पठाइदिन्छु भन्दै ५ जनाबाट ३४ लाख ५० हजार रूपैयाँ लिई सम्पर्कविहीन भएको भन्दै प्रहरीमा उजुरी परेको थियो ।

पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले शारदालाई टोखा नगरपालिका-२ बाट, ऋषि राम र अनितालाई काठमाडौं महानगरपालिका-१३ बाट, अम्बिकालाई काठमाडौं महानगरपालिका-१ बाट र योगेशलाई ललितपुर महानगरपालिका-१० बाट मंगलबार तथा सुनितालाई काठमाडौं महानगरपालिका-१२ बाट र सावित्रालाई भक्तपुर नगरपालिका-१ बाट बुधबार पक्राउ गरेको  हो ।

उनीहरूलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल काठमाडौं पठाइएको छ ।