साविक विजेता अर्जेन्टिना समूह ‘जे’को विजेताका रूपमा जारी फिफा विश्वकपको नकआउट चरणमा पुगेको छ ।

अर्जेन्टिनाले तीनवटै खेलमा जित हात पार्दै नौ अंक बटुल्यो । अर्जेन्टिनाले आफ्नो अन्तिम खेलमा आइतबार बिहान तुलनात्मक रूपमा कमजोर प्रतिद्वन्द्वी जोर्डनमाथि ३–१ गोलको जित निकाल्यो ।

अर्जेन्टिनाका लागि जियोभानी लो सेल्सो, लाउटेरो मार्टिनेज र कप्तान लियोनल मेसीले एक–एक गोल गरे । मेसीले समूहगत चरणका लगातार तीनवटै खेलमा गोल गरे ।

जोर्डनका लागि भने एकमात्र गोल मुसा अल–तामरीले गरे । तीनवटै खेलमा पराजित भएको जोर्डन समूहगत चरणबाटै बाहिरियो ।

यो समूहबाट अस्ट्रिया र अल्जेरिया पनि नकआउट चरणमा पुग्न सफल भए । यी दुवै टोलीले आफ्नो अन्तिम खेलमा ३–३ गोलको बराबरी खेले । दुवै टोली चार–चार अंकसहित अगाडि बढेका हुन् ।