०६ असार २०८३, शनिबार
काठमाडौं –मेलम्ची खानेपानी आयोजना निर्माणको ठेक्का पाएको इटालियन ठेकेदार कम्पनी सीएमसी काममा नफर्किने निश्चितजस्तै भएको छ ।
दुई साताको समय सीमा दिएर गत ६ माघमा सरकारले सीएमसीका नाममा पत्र पठाएको थियो । तर दुई बितिसक्दा पनि सीएमसीले हालसम्म कुनै जवाफ नदिएको मन्त्राल स्रोतले जानकारी दिएको छ ।
यस विषयमा बुझ्न मेलम्ची खानेपानी आयोजना प्रमुख सूर्यराज कंडेललाई पटक–पटक सम्पर्क गर्दा उनले फोन उठाएनन् ।
त्यस्तै सञ्चार माध्यमलाई सूचना उपलब्ध गराउनकै लागि आयोजनाका प्रवक्ता तोकिएका राजेन्द्रप्रसाद पन्तलाई पनि पटक–पटक फोन गर्दा उनीसँग पनि सम्पर्क हुन सकेन ।
खानेपानी तथा सरसफाई मन्त्रालयका प्रवक्ता शंकरप्रसाद सुवेदी भने सीएमसी कम्पनीका बारेमा आफूलाई केही पनि थाहा नभएको बताउँछन् ।
आफू विगत दुई–तीनदेखि काठमाडौं बाहिर रहेको र सीएमसीका बारेमा आफू कुनै पनि अपडेट नरहेकाले आफूलाई कुनै पनि जानकारी नरहेको बताए ।
‘बाहिर जिल्लामा छु,’ सुवेदीले लोकान्तरसँग भने, ‘यस बारेमा मलाई केही थाहा छैन । यसबारे म अपडेट छैन ।’
यसअघि मेलम्चीको पानी काठमाडौं आइपुग्न केही काम मात्रै बाँकी रहेको भनिएका बेला काम छाडेर सीएमसीका प्रतिनिधि नेपालबाट भाग्न खोजेका थिए ।
मेलम्ची खानेपानी योजना र खानेपानी मन्त्रालयको सहयोगमा नेपाल प्रहरीले सीएमसीका प्रतिनिधिलाई पक्राउ गरी खानेपानी मन्त्रालयको जिम्मा लाएको थियो । त्यसपछि नयाँ वर्ष २०१९ को पूर्वसन्ध्यामा नयाँ वर्ष मनाउनका लागि इटाली जाने र नयाँ वर्ष मनाएर मेलम्चीको कामलाई निरन्तरता दिने गरी चाँडै फर्कने भन्दै इटाली गएको थियो । तर नेपाल सरकारले पटक–पटक पत्र पठाउँदा पनि सीएमसिले कुनै जवाफ दिएको छैन ।
गत ६ माघमा पठाएको पत्र अनुसार सीएमसी फर्केर नआएमा ऊसँगको ठेक्का रद्द गरेको पत्र पठाउने र सीएमसीसँगको ठेक्का रद्द गर्ने जानकारी मन्त्रालयले यसअघि नै गराएको थियो ।
नयाँ ठेक्का प्रक्रियाका लागि बढी समय लाग्ने र निर्माणका लागि नेपाली सेनलााई दिँदा दातृ निकायले नमान्ने भएका कारण मेलम्ची आयोजना अन्योलमा परेको छ ।
