०९ असार २०८३, मंगलबार
ट्विटरमा अन्य प्रयोगकर्तालाई आफ्नो ट्वीटमा रिप्लाई गर्नबाट ब्लक गर्न मिल्ने फीचर ल्याउन लागिएको छ ।
ट्विटरले लास भेगासमा आयोजित एक समारोहमा नयाँ फीचर सार्वजनिकीकरण गर्दै कम्पोज ट्वीट स्क्रीनमा चारवटा रिप्लाई सेटिङ राखेको देखाएको छ : ग्लोबल, ग्रूप, प्यानल र स्टेटमेन्ट ।
यी विभिन्न विकल्पमा जोकोहीलाई पनि रिप्लाई गर्न दिने, आफूले फलो गरेको वा मेन्सन गरेको व्यक्तिमा मात्र रिप्लाई सीमित गर्ने, मेन्सन गरिएको व्यक्तिले मात्र कमेन्ट गर्न पाउने र सबै कमेन्ट ब्लक गर्ने सुविधा छ ।
ट्विटरमा ट्रोलिङ रोक्नका लागि यो फीचर ल्याउन लागिएको भनी कम्पनीले तर्क गरे पनि उक्त कार्यक्रममा सहभागीहरूले रिप्लाई गर्न नपाएर झूटो सूचना कसरी निराकरण गर्न सकिन्छ भनी प्रश्न गरेका थिए ।
यस परीक्षणबाट प्राप्त सूचनाको उपयोग गनरेर सन् २०२० को अन्त्यमा यसलाई संसारभरि लागू गर्ने ट्विटरको भनाइ छ ।
यो परिवर्तन गलत सूचनाको बाढीलाई रोक्न तथा अस्वस्थ संवादलाई घटाउन लक्षित रहेको ट्विटरले बतायो ।
परीक्षणकालमै रहेकाले यो फीचर सानो समूहका प्रयोगकर्ताका लागि मात्र उपलब्ध छ ।
अबका केही महिनामा नयाँ रिप्लाई सिस्टमको परीक्षण गर्ने र यसको सूक्ष्म निगरानी गरेर यसमा प्रतिक्रिया लिने अनि त्यसपछि मात्र यसलाई बृहत्तर रूपमा उपलब्ध गराउने कि नगराउने भन्ने निर्णय लिने ट्विटरले बतायो ।
एजेन्सी
