०४ असार २०८३, बिहीबार
भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावलले निजामती कर्मचारीको ५५ वर्षे उमेर हद सम्बन्धी विषय संसद्मा पेश भएपछि टुंगो लाग्ने बताएकी छन् ।
बुधबार प्रतिनिधिसभामा विनियोजन विधेयकमाथिको छलफलका क्रममा सांसदहरूले उठाएका प्रश्नको जवाफ दिँदै मन्त्री रावलले प्रस्तावित संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक हाल कानून, न्याय तथा संसदीय मामिला मन्त्रालयमा रायका लागि रहेको जानकारी दिइन् ।
उनले उक्त विधेयक संसद्मा पेस भएपछि त्यसमा समावेश उमेर हदलगायतका विषयमा संसद्बाटै निर्णय हुने बताइन् ।
मन्त्री रावलले प्रस्तावित निजामती सेवा विधेयक अहिले प्रक्रियामै रहेको र संसद्मा प्रवेश गरेपछि आवश्यक छलफल तथा निर्णय हुने भन्दै यस विषयमा थप टिप्पणी गर्न चाहिनन् ।
