१४ असार २०८३, आइतबार
इजरायलले लेबनानमा लगातार आक्रमण जारी राखेर युद्धविराम सम्झौता उल्लंघन गरेको आरोप लगाउँदै इरानले रणनीतिक रूपमा महत्त्वपूर्ण 'हर्मुज जलसन्धि' बन्द गर्ने घोषणा गरेको छ । इरानी सेनाले अमेरिका र इजरायलले हालै भएको १४ बुँदे सहमति पालना नगरेको दाबी गर्दै यो कदम चालेको हो ।
इरानको इस्लामिक रिभोलुसनरी गार्ड कप्र्स (आईआरजीसी) ले एकचेतावनी जारी गर्दै कुनै पनि जहाजलाई हर्मुज जलसन्धिमा प्रवेश नगर्न भनेको छ ।
इरानले लेबनानमा इजरायली आक्रमणबाट करिब दुई दर्जन मानिसको मृत्यु भएको घटनालाई सम्झौताको गम्भीर उल्लंघन भनेको छ । गत बुधबार मात्र अमेरिका र इरानबीच भएको सहमतिमा सबै मोर्चामा सैन्य कारबाही रोक्ने र व्यापारिक जहाजहरूलाई सुरक्षित मार्ग दिने उल्लेख थियो ।
यता, अमेरिकी सैन्य कमाण्ड (सेन्ट्रकम) ले भने हर्मुज जलसन्धिबाट व्यापारिक जहाजहरूको आवागमन जारी रहेको र मार्ग सुरक्षित रहेको दाबी गरेको छ । सेन्ट्रकमका अनुसार शनिबार मात्रै ५५ वटा व्यापारिक जहाजहरू उक्त मार्ग हुँदै आवतजावत गरेका छन् ।
अमेरिकी उप-राष्ट्रपति जेडी भान्सले पनि इरानले जलसन्धि बन्द गरेको कुनै प्रमाण फेला नपरेको र ठूलो मात्रामा तेलको ढुवानी भइरहेको बताए ।
इजरायल र हिजबुल्लाह दुवैले एकअर्कामाथि युद्धविराम उल्लंघनको आरोप लगाइरहेका छन् । इजरायली सेनाले हिजबुल्लाहका दर्जनौं ठेगानामा आक्रमण गरेको स्वीकार गर्दै आफ्नो सुरक्षाका लागि 'खतरा' हटाउन अपरेशन जारी राख्ने बताएको छ ।
हिजबुल्लाहले भने अमेरिकाद्वारा घोषित युद्धविरामलाई आफूले मान्यता नदिएको र लेबनानभित्र इजरायलको स्वतन्त्र सैन्य उपस्थितिलाई स्वीकार नगर्ने स्पष्ट पारेको छ ।
यसैबीच, थप वार्ताका लागि भोलि स्विट्जरल्याण्डको बुर्जेनस्टकमा अमेरिका र इरानका प्रतिनिधिहरूबीच बैठक हुने तय भएको छ । पाकिस्तान र कतारको मध्यस्थतामा हुने उक्त वार्तामा इरानले अमेरिकालाई आफ्ना प्रतिबद्धताहरू पूरा गर्न दबाब दिने बताइएको छ ।
