१५ असार २०८३, सोमबार
नेकपा (एमाले)का उपाध्यक्ष तथा पूर्वअर्थमन्त्री विष्णु पौडेललाई गैरकानूनी रूपमा थुनामा राखिएको दाबी गर्दै सर्वोच्च अदालतमा बन्दी प्रत्यक्षीकरणको रिट दायर गरिएको छ ।
पौडेलकी पत्नी दोमाया पौडेलले दायर गरेको रिट बुधबार सर्वोच्च अदालतमा दर्ता भएको प्रवक्ता अर्जुनप्रसाद कोइरालाले जानकारी दिए । उनका अनुसार रिटमाथिको सुनुवाइका लागि भोलि बिहीबार पेसी तोकिएको छ ।
रिटमा सम्पत्ति शुद्धीकरण अनुसन्धान विभागले राजनीतिक प्रतिशोधका आधारमा कुनै ठोस प्रमाण र आधारबिना पौडेललाई पक्राउ गरेको भन्दै तत्काल रिहा गर्न माग गरिएको छ ।
सम्पत्ति शुद्धीकरण अनुसन्धान विभागले दीपक भट्ट र कमलकिशोर मालपानी समूहबीच भएको सेयर कारोबारमा चिनजान गराइदिएको भन्ने बयानका आधारमा पौडेललाई पक्राउ गरिएको रिटमा उल्लेख छ ।
प्रहरीले गत सोमबार जरुरी पक्राउ पुर्जीका आधारमा पौडेललाई सुर्खेतबाट साँझ करिब ५:१५ बजे पक्राउ गरेको थियो ।
त्यसपछि स्थलमार्ग हुँदै मंगलबार काठमाडौं ल्याइएका पौडेललाई मंगलबार नै अदालत पेस गरिएको थियो ।
विशेष अदालतले पक्राउ पुर्जीको समर्थन गर्दै थप अनुसन्धानका लागि पौडेललाई हिरासतमा राख्न ७ दिनको म्याद थप अनुमति दिएको थियो ।
