०८ साउन २०८३, शुक्रबार
अमेरिकाकी पहिलो हिन्दू सांसद तुलसी गब्बार्डले अप्ठ्यारो पर्दा मानिसले श्रीमद्भगवद्गीता अध्ययन गर्दा शान्ति र शक्ति प्राप्त गर्न सक्ने बताएकी छन् ।
हिन्दू विद्यार्थीहरूका लागि २०२० को कक्षा नामक एक अन्लाइन कार्यक्रममा सहभागी भई गब्बार्डले यो कुरा बताएकी हुन् ।
अमेरिकाको हवाईबाट सांसद रहेकी गब्बार्डले अहिले अव्यवस्थाको वातावरणमा गीता अध्ययन गरेर श्रीकृष्णको भक्तियोग तथा कर्मयोगको अभ्यास गर्दा शान्ति पाइने बताइन् ।
हिन्दू स्टुडेन्ट्स काउन्सिलले उक्त अन्लाइन कार्यक्रम आयोजना गरेको थियो । फेसबूक र यूट्युब लाइभमार्फत हजारौं मानिसले त्यसमा भाग लिएका थिए । विभिन्न देशमा रहेका हिन्दू युवाले त्यसमा भाग लिएका थिए । कार्यक्रममा युवाहरूले हिन्दू मूल्यमान्यताको सेलिब्रेसन गरेका थिए ।
गब्बार्डले भनिन्, ‘जीवनमा नयाँ अध्याय शुरू गर्दै हुनुहुन्छ भने आफैंलाई सोध्नुस्– जीवनको उद्देश्य के हो ? जिन्दगीको उद्देश्य ईश्वरको र ईश्वरका सन्तानको सेवा गर्नु हो भनी तपाईंले थाहा पाएपछि सफल जिन्दगी बाँच्न सक्नुहुन्छ ।’
