पृथ्वी जयन्ती तथा राष्ट्रिय एकता दिवसको अवसरमा ‘त्यही सच्चा नेपाली’ बोलको देशभक्तिपूर्ण गीत सार्वजनिक भएको छ ।

म्युजिक नेपालको यूट्युब च्यानलमार्फत् सार्वजनिक गीतमा ३० भन्दा बढी र अग्रज, लोकप्रिय, चर्चित अनुहारहरूको अभिनय रहेको छ ।

चलचित्र यात्राको निर्माता समेत रहेका चीजकुमार श्रेष्ठको निर्माण रहेको गीतमा गायिका देविका बन्दना तथा गायक राजन ईशानको स्वर रहेको युगल राष्ट्रिय गीतको म्युजिक भिडियो निर्माण सम्पन्न भइसकेको छ ।

अभिनेत्री तथा निर्मात्रीको रूपमा सक्रिय म्युजिक भिडियोकी निर्देशक रोशनी केसीका अनुसार गीतमा ३० जना जनाभन्दा बढी लोकप्रिय कलाकारले अभिनय गरेका छन् ।

निर्माता श्रेष्ठले एउटै भिडियोमा यति धेरै लोकप्रिय अनुहारले अभिनय गरेको यो पहिलोपटक भएको बताए । ४ दिन लगाएर छायांकन सम्पन्न गरिएका भिडियोहरूमा विभिन्न स्थानका दृश्य समेटिएको छ ।

आनन्द अधिकारीको शब्द तथा राजन ईशानको संगीत निर्देशनको ‘त्यही सच्चा नेपाली’ गीतमा वरिष्ठ अभिनेता निर शाहदेखि संस्कृतिविद् सत्यमोहन जोशीसम्मले अभिनय गरेका छन् ।

रामशरण उप्रेतीद्वारा छायांकन गरिएको भिडियोलाई अर्जुन जिसीले सम्पादन गरेका छन् भने रेनिश फागोले ‘कलर करेक्सन’ गरेका छन् ।

भिडियोमा सत्यमोहन जोशी, निर शाह, गौरी मल्ल, करिश्मा मानन्धर, निर्मल शर्मा, राजाराम पौडेल, दीपाश्री निरौला, दिनेश डिसी, नम्रता सापकोटा, निराजन प्रधान, प्रशान्त ताम्राकार, आकाश श्रेष्ठ, उषा खड्गी, कविता शर्मा, दिलिप रायमाझी, देविका बन्दना, अनु शाह, छुल्ठिम गुरुङ, धीरेन शाक्य, सम्राट सापकोटा, शिवशंकर रिजाल, खुश्बु खड्का, कविता खड्का, दीपा शाक्य, रजनी केसी, दीपक घिमिरे, शिलाष्मा हमाल लगायत कलाकारले अभिनय गरेका छन् ।

भिडियोमा विक्रम स्वाँरको कोरियोग्राफी छ भने चिजकुमार श्रेष्ठको प्रस्तुतिमा भिडियो तयार भएको हो । ‘रियल जिन्दगीमा राजनीतिक क्षेत्रमा रहेका विकृति विसंगतिबाट वाक्कदिक्क लागेपछि म रिल जिन्दगीतिर लागें,’ निर्माता श्रेष्ठले भने, ‘राष्ट्रियता संकटमा परेको बेला देश भक्तिपूर्ण गीतमा काम गर्न मन लाग्यो । मलाई लाग्छ – एउटा उत्कृष्ट गीत र भिडियो बनेको छ ।’

‘देशले मलाई के दियो भनेर सोच्ने/सोध्नेहरूको भीडमा मैले देशलाई के दिएँ भनेर सोच्नु र तदनुरूप काम गर्नुपर्छ भन्ने सन्देश दिन चाहन्छु,’ उनले भने ।