२० असार २०८३, शनिबार
अमेरिकाको केप कोडमा गत शुक्रवार ह्वेल माछाको मुखमा पुगेर पनि जिउँदै फर्किन सफल माइकल प्याकार्ड २० वर्षअघि विमान दुर्घटनामा पनि परेको पाइएको छ ।
कोस्टारिकाको एक जंगलमा भएको उक्त विमान दुर्घटनामा तीनजना मारिएका थिए भने पाँचजना जंगलमा हराएका थिए ।
प्याकार्डले सन् १९९० देखि कोस्टारिकामा रमाइलाका लागि माछा मार्ने गरिरहेका थिए । सन् १९९८ मा उनले मार हुरोन स्पोर्टफिशिङ नामक कम्पनी खोलेका थिए ।
उनी केप कोड र कोस्टारिका आउजाउ गरिरहन्थे ।
शुक्रवार पनि उनी महासागरमा लब्स्टर खोज्न पुगेका थिए ।
‘म महासागरमा निकै तल पुगेको थिएँ । अनि मैले अचानक ठूलो कुराले मलाई हिर्काएको अनुभव गरें । अनि सबै कुरा अँध्यारो भयो । मैले भनें– हे भगवान्, म ह्वेलको मुखमा छु,’ उनले एनबीसी१० बोस्टनसँगको अन्तर्वार्तामा बताए ।
पहिला त उनलाई शार्कले आक्रमण गरेको हो कि जस्तो लाग्यो । तर तीखो दाँत अनुभव नगरेको र पीडा पनि नभएको अनुभव गरेपछि उनले के भएको थाहा पाए ।
उनी ह्वेलको मुखमा एक मिनेटसम्म थिए । पछि ह्वेलले गलत कुरा मुखमा हालिएछ भन्ने लागेर आफूलाई थुकेर फालेको प्याकार्ड दाबी गर्छन् ।
