१९ असार २०८३, शुक्रबार
अमेरिकाको न्यु मेक्सिकोमा यात्रुहरू सवार एक हट एयर बलून शनिवार बिजुलीको तारमा ठोकिएपछि पाँचजनाको मृत्यु भएको छ ।
मृत्यु हुनेमा सेवानिवृत्त प्रहरी अधिकृत मार्टिन मार्टिनेज र उनकी पत्नी मेरी पनि छन् ।
अन्य मृतकको नाम सार्वजनिक गरिएको छैन । उनीहरू न्यु मेक्सिकोमै बस्ने अधबैंसेहरू भएको बताइएको छ । हट एयर बलूनका चालकको पनि मृत्यु भएको बताइएको छ ।
बलूनलाई हावाले उडाएर बिजुलीको तार भएतिर हुत्त्याएको र त्यसमा आगो लागेको अनि त्यसको बास्केट विशाल रंगीचंगी बलूनबाट छुट्टिएको बताइएको छ ।
उक्त बास्केट आगो लागेर भुइँमा खसेको थियो । व्यस्त सडकमा त्यो खसेको थियो । 
रंगीचंगी बलूनलाई एक माइल पर एउटा घरको आँगनमा फेला पारिएको थियो ।
स्थानीयहरू आगो निभाउने साधन लिएर बास्केट भएतिर दौडिएका थिए । तर चारजनाको घटनास्थलमै मृत्यु भयो भने एकजना अस्पताल लगेको केही छिनपछि बिते ।
घटनापछि विद्युत् आपूर्ति बन्द भएर १३ हजार घर प्रभावित भएका थिए । प्रहरीले घटनाको अनुसन्धान गरिरहेको छ ।
