फुटबल इतिहासका महान् खेलाडीमध्येका एक क्रिस्टियानो रोनाल्डो यतिबेला आफ्नो करियरको एउटा यस्तो चुनौतीसँग जुधिरहेका छन्, जसले उनलाई विगत २१ वर्षदेखि पच्छ्याइरहेको छ। 

४१ वर्षको उमेरमा आफ्नो छैटौँ विश्वकप खेलिरहेका रोनाल्डोले हालसम्म विश्वकपको नकआउट चरणमा एउटै पनि गोल गर्न सकेका छैनन् । शुक्रबार बिहान पौने ५ बजे टोरन्टोमा पोर्चुगलले क्रोएसियाको सामना गर्दा रोनाल्डोको मुख्य लक्ष्य विश्वकपको नकआउट खेलमा गोल गर्न नसकेको आफ्नो बिर्सनलायक रेकर्डलाई सुधार गर्नु हुनेछ।

रोनाल्डोले हालै उज्बेकिस्तानविरुद्ध गोल गर्दै छ वटा फरक विश्वकपमा गोल गर्ने विश्वकै पहिलो खेलाडी बनेर कीर्तिमान रचेका छन्। विश्वकप इतिहासमा १० गोल गर्दै उनी ग्यारी लिनेकर र थोमस मुलर जस्ता दिग्गजहरूको सूचीमा परे पनि ती सबै गोल समूह चरणमा मात्र सम्भव भएका हुन्। 

आठवटा नकआउट खेल खेलिसक्दा पनि रोनाल्डोको नाममा एउटा पनि गोल नहुनुले धेरैलाई अचम्ममा पारेको छ।
रोनाल्डोको विश्वकप यात्रा सन् २००६ देखि सुरु भएको हो, जहाँ उनले इरानविरुद्ध गोल गर्दै पोर्चुगलका लागि सबैभन्दा कान्छो गोलकर्ताको कीर्तिमान बनाएका थिए।

 तर, सन् २०१० मा दक्षिण अफ्रिकामा स्पेनसँग पराजित हुँदा होस् वा २०१४ मा ब्राजिलमा समूह चरणबाटै बाहिरिँदा, रोनाल्डो सधैँ आलोचनाको केन्द्रमा रहे।

सन् २०१८ को विश्वकपमा स्पेनविरुद्ध सानदार ह्याट्रिक गरेर सुरुवात् गरे पनि नकआउट चरणमा उरुग्वेसँगको खेलमा उनी फेरि गोलविहीन रहे। त्यस्तै, सन् २०२२ को कतार विश्वकप रोनाल्डोका लागि निकै पीडादायी रह्यो। प्रशिक्षक फर्नान्डो सान्तोषसँगको विवादपछि नकआउट खेलहरूमा बेन्चमा बस्नुपरेका रोनाल्डो मोरक्कोसँगको हारपछि रुँदै मैदानबाट बाहिरिएका थिए। 

त्यसबेला उनले आफ्नो विश्वकप जित्ने सपना समाप्त भएको समेत बताएका थिए।
तर, फुटबल प्रतिको लगाव र कडा मिहिनेतका कारण ४१ वर्षको उमेरमा उनी २०२६ को विश्वकपमा पनि मैदानमा उत्रिएका छन्। समूह चरणमा उज्बेकिस्तानविरुद्ध गोल गरेपछि उनले क्यामरामा हेर्दै आफू फर्किएको सन्देश दिएका थिए।

 यद्यपि, कोलम्बिया र डिआर कंगो विरुद्धका पछिल्ला खेलहरूमा उनको प्रदर्शन खासै प्रभावशाली देखिन सकेन। अब लुका मोड्रिचको नेतृत्वमा रहेको अनुभवी क्रोएसियाविरुद्धको खेलमा रोनाल्डोमाथि ठूलो दबाब र अपेक्षा दुवै रहेको छ। 
के उनले अन्ततः आफ्नो करियरको अन्तिम मोडमा आएर विश्वकपको नकआउट चरणमा गोलको खडेरी समाप्त गर्लान् ? यो हेर्न सारा विश्व प्रतीक्षा गरिरहेको छ।