१४ असार २०८३, आइतबार
निःसन्तान दम्पतीले बच्चा जन्माउन कोख भाडामा लिने गरेको सुनिन्छ तर जन्मिसकेकी छोरीले आमा भाडामा लिएको अनौठो घटना चीनमा भएको छ ।
आमाको निधन भएपछि चीनको शाङ्सी प्रदेशमा बस्ने ४६ वर्षीया चेङ जीङले हजुरआमालाई दुःख नलागोस् भनेर ‘नक्कली आमा’ भाडामा लिएकी हुन् । हजुरआमाको भावनाप्रति संवेदनशील चेङले आमाको निधनपछि भाडामा आमा राख्ने निधो गरेकी थिइन् ।
हजुरआमालाई आफ्नी छोरीको मृत्युबारे थाहा नहोस् भनेर चेङले नक्कली आमा राखेकी हुन् । चेङकी आमाको ६९ वर्षको उमेरमा निधन भएको थियो ।
चाइना डेलीका अनुसार भाडामा लिइएकी महिलाको आवाज चेङकी आमासँग मिल्दोजुल्दो थियो । हजुरआमाबाट टाढा रहेकी चेङले फोनबाट कुरा गर्ने थिइन्, सँगसँगै ‘नक्कली आमा’लाई पनि कुरा गराउँथिन् ।
आफ्नी छोराको आवाज पहिलाजस्तो नभएपछि हजुरआमाले शंका गर्न थालेकी थिइन् । तर रुघाखोकी लागेर, सञ्चो नभएर आवाज बिग्रिएको बताउने गरिएको थियो । यसरी हजुरआमाले नक्कली आमालाई आफ्नै छोरी सम्झेर कुरा गर्ने गरिन् ।
हजुरआमाले छोरी र नातिनीलाई घर आउन निम्तो समेत दिने गरेकी थिइन् । तर अनेक बहाना बनाउँदै चेङ हजुरआमालाई भेट्न गइनन् । बरु फोनबाटै नक्कली आमासँग कुरा गराइरहिन् ।
चेङले चाइना डेलीसँग भनिन्, ‘मेरा हजुरबुवाको मृत्यु हजुरआमा ३० वर्षकी हुँदा नै भएको थियो । हजुरआमाबाट एकै सन्तान थिइन्, मेरी आमा । मेरी आमालाई हजुरआमाले नै पालनपोषण गरेकी थिइन् । मेरी आमा नै हजुरआमाको जिन्दगीमा नजिक थिइन् । तसर्थ आमाको मृत्युको खबरले हजुरआमालाई दुःख लाग्ने भएकाले भाडामा नक्कली आमा राख्नुपर्यो ।’
