नेकपा एमालेले महाधिवेशनबाट नै केन्द्रीय कमिटीका पदाधिकारी निर्वाचित गर्ने गरी संगठन संरचनाको प्रस्ताव स्थायी कमिटीको बैठकमा पेश गरेको छ । 

आज ललितपुरको तुलसीलाल स्मृति प्रतिष्ठानमा बसेको बैठकमा आगामी विधान महाधिवेशनमा प्रस्तुत हुने दस्तावेजमा छलफल शुरू भएको छ ।

यसअघि केन्द्रीय सदस्य र अध्यक्ष मात्रै महाधिवेशनबाट निर्वाचित हुने र पदाधिकारी भने अध्यक्षले मनोनयन गर्ने गरी संगठन संरचनाको प्रस्ताव गरिएको थियो । पार्टीभित्र उक्त प्रस्तावको तीव्र आलोचना भएपछि एमालेले त्यसलाई संशोधन गरेर स्थायी कमिटीमा प्रस्ताव आएको बैठकमा सहभागी एक नेताले बताए ।

एमाले अध्यक्ष केपी ओलीको चाहनामा उक्त प्रस्ताव आएको भन्दै नेता कार्यकर्ताहरूले विरोध गरेका थिए । तर, ओलीको चाहनामा मनोनयन गर्ने प्रस्ताव नआएको स्थायी कमिटीका एक नेताले बताए ।

‘त्यसबेला पार्टी अध्यक्षको चाहनामा पदाधिकारी मनोनयन गर्ने प्रस्ताव आएको होइन । स्थायी समितिका केही साथीहरूको त्यस्तो चाहना थियो । प्रस्ताव गरौँ न त प्रतिक्रिया के हुँदो रहेछ भनेर त्यस्तो प्रस्ताव ल्याइएको हो । यसमा अहिले परिमार्जन भइसकेको छ,’ बैठकमा सहभागी एक नेताले भने । 

‘पार्टीलाई प्रादेशिक संरचनामा लैजाने गरी संगठन संरचनाको प्रस्ताव आएको छ । सबै पदाधिकारी महाधिवेशनबाटै निर्वाचित हुने व्यवस्था उल्लेख गरिएको छ । उक्त प्रस्तावमा स्थायी कमिटीका नेताहरूले सुझाव दिने क्रम शुरू भएको छ,’ एक नेताले भने । 

एमालेले केन्द्रीय कमिटीमा उपाध्यक्षको संख्या घटाउने र सचिवको संख्या बढाउने प्रस्ताव गरेको छ । सबै प्रदेश र समावेशी समानुपातिक प्रतिनिधित्वलाई ध्यान दिएर सचिवको संख्या बढाउने प्रस्ताव गरिएको एमाले स्थायी कमिटी स्रोतले बताएको छ । 

धेरैजसो नवौँ महाधिवेशनले पारित गरेअनुसारकै संगठन संरचना रहेको स्रोतले बतायो ।

त्यसबाहेक नेताहरूको उमेर हद पनि ७० वर्ष नै कायम गरिएको छ । ‘आगामी दशौं महाधिवेशनमा उम्मेदवार बन्न ७० वर्षे उमेर हदले कसैलाई रोक्दैनन् । त्यसो हुँदा उमेर हद ठूलो बहसको विषय छैन । त्यसपछिको महाधिवेशनमा पनि ७० वर्ष उमेर पुगेका नेता उम्मेदवार बन्न चाहे भने त्यतिबेला फेरि छलफल हुन सक्छ,’ स्रोतले भन्यो । 

एउटै पदमा दुई पटक भन्दा बढी दोहोरिन नमिल्ने व्यवस्था पनि यथावत् राखिएको छ । 

स्थायी कमिटीमा पेश भएको प्रस्तावमा आज अमृत बोहोरा, केशव बडाल, पुष्प कँडेल, घनश्याम भुसाल, युवराज ज्ञवालीले आफ्नो विचार प्रस्तुत गरेका थिए ।

स्थायी कमिटीमा सबै सदस्यको सुझावसहित पारित भएको दस्तावेज केन्द्रीय कमिटीमा पेश हुन्छ । एमालेले असोजको ८ र ९ गतेका लागि केन्द्रीय कमिटी बैठक बोलाएको छ । 

त्यसैगरी एमालेले असोजको १५ देखि १७ सम्म विधान महाधिवेशन बोलाएको छ । विधान महाधिवेशनमा पेश हुने विधान संशोधन, राजनीतिक प्रतिवेदन र संगठनात्मक प्रतिवेदनमा एमालेका स्थायी कमिटी बैठकमा छलफल भइरहेको छ ।