बेलायतकी पहिलो दर्जाकी टेनिस खेलाडी एम्मा राडुकानुलाई सताउने व्यक्ति अमृत मगरलाई त्यहाँको प्रहरीले पक्राउ गरेको छ । 

एजवेयरका मगरलाई शुक्रवार ब्रोम्ली मजिस्ट्रेट अदालतले दोषी ठहर गरेको हो । उनलाई पछि सजायको घोषणा गरिनेछ । 

दक्षिणी लन्डनमा रहेको राडुकानुको घरमा रहेको सीसीटीभी क्यामरामा मगरको अनुहार क्याप्चर भएको थियो । उनको घरमा मगरले नोट र कार्डहरू छोडेका थिए ।

राडुकानुले मगरका कारण आफूलाई घरबाहिर निस्कन समेत डर लागेको भनी अदालतसमक्ष बयान दिएकी थिइन्ु । 

‘मेरो स्वतन्त्रता हरण गरेको जस्तो अनुभव भइरहेको छ । म घरिघरि पछाडि फर्केर हेर्छु । म जतिखेर पनि तर्सिन्छु र फेरि ममाथि केही होला भनी गम्छु । आफ्नै घरमा समेत म असुरक्षित अनुभव गर्छु,’ उनले भनिन् । 

मगर राडुकानुको घरमा गत डिसेम्बर महिनामा पटकपटक पुगेका थिए । 

पहिलापहिला अमेजनको ट्रक चलाउने गरेका मगरले आफू २३ माइल हिँडेर राडुकानुको घर आइपुगेको भनी नोटमा लेखेका थिए । 

अर्को नोटमा उनले तिमीलाई मायाको खाँचो छ लेखेका थिए । 

राडुकानु साबिक यूएस ओपन च्याम्पियन हुन् ।