०८ साउन २०८३, शुक्रबार
संस्कृतिविद् सत्यमोहन जोशीले अस्वस्थताका कारण मतदान नगर्ने भएका छन् ।
उनको मतदानस्थल ललितपुरको आदर्श कन्या निकेतन माध्यमिक विद्यालयमा परेको छ । मंगलबजारको उक्त मतदान केन्द्र नजिकै घर भए पनि स्वास्थ्य लाभ गरेर घरमै आराम गर्ने भएकोले उनी मतदान गर्न नजाने भएका हुन् ।
जोशीले आफूलाई सञ्चो नभएकोले परिवारका सदस्यसँग घरमै बस्ने र मतदान गर्न जान नसक्ने बताए । जोशी आजैबाट १०३ वर्ष लागेका छन् । उनको जन्मोत्सवको अवसरमा परिवारका सदस्यसँगै बस्ने भएका हुन् ।
मंगलबजारको १२ नम्बर वडा कार्यालयको मतदानस्थल पुगेको ललितपुर महानगरका कांग्रेस उम्मेदवार चिरिबाबु महर्जनले उनको स्वास्थ्य अवस्थाबारे आफूले पनि जानकारी लिएको बताए ।
महर्जनले भने ‘मैले परिवारका सदस्यसँग फोनमा कुराकानी गरेको छु । जोशीको माइला छोरा विदेशबाट घर आएका छन् ।’
उनलाई स्वास्थ्यमा लाभ नभएको भनेर परिवारका सदस्यले जानकारी दिए । तर, पनि दिउँसो जोशीको इच्छा भयो भने परिवारका सदस्यले मतदान गर्न ल्याउन सक्ने विषयको जानकारी आफूलाई गराएको महर्जनले लोकान्तरलाई बताए ।
