०२ असार २०८३, मंगलबार
भोलि अर्थात् सेप्टेम्बर १७ का दिन भारतभर प्रधानमन्त्री नरेन्द्र मोदीको जन्मदिन मनाउने कार्यक्रम तय गरिएको छ । मोदीको जन्मदिनमा उनको दल भारतीय जनता पार्टी (भाजपा)सहित सरकारी र गैर–सरकारी संघ संस्थाहरूले विभिन्न कार्यक्रम तय गरेका छन् ।
यसैक्रममा भाजपाको तामलिनाडू इकाईले भने विशेष कार्यक्रम तय गरेको छ । भापजा तमिलनाडु इकाइले मोदीको जन्मदिनको अवसरमा जन्मिने नवजात शिशुहरूलाई सुनको औँठी दिने निर्णय गरेको छ । यति मात्र होइन, तामिलनाडु सरकारले मोदीको जन्मदिनको अवसरमा ७२० किलोग्राम माछा वितरण गर्ने कार्यक्रम पनि तय गरिएको छ ।
तामिलनाडुका सूचना र प्रसारण राज्यमन्त्री एल मुरुगनले चेन्नईको सरकारी अस्पतालमा आरएसआरएममा जन्मेका बच्चाहरूलाई सुनको औँठी दिइने जानकारी दिए । औँठी वितरणका लागि उक्त अस्पताल छनोट गरिएको उनले बताए ।
राज्यमन्त्री मुरुगनले प्रत्येक औँठी करिब २ ग्राम सुनको हुने र त्यसको मूल्य करिब ५ हजार भारतीय रुपैयाँ पर्ने बताए । उनले यो निःशुल्क वितरण गरिने जानकारी दिए । ‘हामी प्रधानमन्त्रीको जन्मदिनमा जन्मिएकाहरूलाई स्वागत गर्न चाहन्छौँ’, उनले भने ।
भाजपाको स्थानीय इकाईले सेप्टेम्बर १७ मा यस अस्पतालमा १० देखि १५ जना बच्चाहरू जन्मन सक्ने अनुमान गरेको छ ।
मोदीको जन्मदिनको अवसरमा मुख्यमन्त्री एमके स्टालिनको निर्वाचन क्षेत्रमा ७२० केजी माछा वितरण गरिने बताए । प्रधानमन्त्री मत्स्य सम्पदा योजनाको उद्देश्य माछाको उपभोगलाई प्रोत्साहित गर्नु रहेको छ । त्यही उद्धेश्य अनुसार मोदीको जन्मदिनमा माछा वितरणको कार्यक्रम तय गरिएको हो ।
भोलि अर्थात् सेप्टेम्बर १७ का दिन मोदी ७२ वर्ष पुग्दैछन् । उनको उमेरलाई आधार मानेर ७२० केजी माछा वितरणको योजना बनाइएको मन्त्री मुरुगनले बताए ।
