नेपाली कांग्रेसका महामन्त्री विश्वप्रकाश शर्माले अर्का महामन्त्री गगन थापालाई कांग्रेस संसदीय दलको नेता तथा प्रधानमन्त्रीमा समेत प्रस्ताव गर्ने बताएका छन् । 

काठमाडौं क्षेत्र नम्बर ४ बाट प्रतिनिधि सभा सदस्यमा निर्वाचित गगनलाई आफूले संसदीय दलको नेता हुँदै प्रधानमन्त्रीमा पनि प्रस्ताव गर्ने घोषणा गरेका हुन् । मंगलवार सामाजिक सञ्जालमा सन्देश लेख्दै महामन्त्री शर्माले गगनलाई बधाई पनि दिएका छन् । 

थापा नेकपा एमालेका डा. राजन भट्टराईलाई पराजित गर्दै काठमाडौं ४ बाट प्रतिनिधि सभा सदस्य पदका निर्वाचित भएका छन् । शर्मा पनि झापा क्षेत्र नम्बर १ बाट निर्वाचित हुने तरखरमा छन् । उनी फराकिलो मतान्तरसहित अग्र स्थानमा छन् । जारी मतगणनाको ताजा स्थितिमा शर्माले २३ हजार ३८५ मत पाएका छन् भने उनलाई एमालेका अग्नि खरेलले १४ हजार ४५ मतसहित पच्छ्याइरहेका छन् ।