अमेरिकाको सान फ्रान्सिस्को प्रहरी विभागले मानिसमाथि गोली चलाउन सक्ने रोबोट राख्न खोजेको छ ।

विभागको यो योजनालाई मञ्जूरी दिइएमा रोबोट भर्ती गर्ने संसारकै पहिलो विभाग बन्नेछ । 

प्रहरी अधिकारीको ज्यान जोखिममा पर्ने कारवाहीमा यी रोबोटहरू उपयोग गरिनेछ । 

सान फ्रान्सिस्को प्रहरीसँग अहिले १७ रोबोट छन् । तीमध्ये १२ वटा रोबोट काम गर्न तयार छन् । 

यिनीहरूलाई बम पत्ता लगाएर नष्ट गर्नका लागि मात्र प्रयोग गरिएको छ । प्रहरीले यी रोबोटहरूलाई हत्याको अधिकार अर्थात् संवेदनशील कारवाहीका क्रममा आरोपितलाई मार्न पाउने अधिकार दिन माग गरेका छन् । 

यी रोबोटहरूमा हतियार जडान गर्न मिल्ने व्यवस्था पनि छ । अलिकति मोडिफाई गरेपछि रोबोटले गोली पनि चलाउन सक्छ । 

रोबोटमा शटगनको गोली, ग्रिनेड लोन्चर, मशिनगन र एन्टी मटेरियल राइफल पनि फिट गर्न सकिन्छ । 

रोबोटहरूलाई आपराधिक घटनाको भनक पाउन, हत्याको अधिकार सदुपयोग गर्न तथा गम्भीर परिस्थितिका लागि तयार रहन प्रशिक्षण दिइनेछ ।