कोरोना भाइरस विरुद्धको खोप करीब ५० लाख मात्रा मौज्दात रहेको छ ।

कोरोना भाइरसको संक्रमण घट्दै गएपछि खोपको माग पनि कम भएकाले मौज्दात रहन गएको हो । 

स्वास्थ्य सेवा विभाग आपूर्ति व्यवस्थापन शाखा प्रमुख  डा. सुरेन्द्र चौरसियाका अनुसार हाल ४९ लाख २१ हजार ६३२ मात्रा खोप मौज्दात छ । उनले अहिले संक्रमण घटिरहेकाले माग नहुँदा खोपको मौज्दात रहेको जानकारी दिए ।

सबैभन्दा बढी भेरोसेल खोप मौज्दात  छ । भेरोसेल ४३ लाख ६६ हजार १६६ मात्रा मौज्दात छ भने फाइजर ६० हजार ७५६ र फाइजर (बालबालिका)लाई लगाउने ४ लाख ९४ हजार ७१० मात्रा मौज्दात छ ।

सबैभन्दा बढी केन्द्रीय भण्डारण केन्द्र टेकुमा ४० लाख मात्रा भेरोसेल मौज्दात छ । 

१ नम्बर प्रदेशमा ५ हजार ३७३, मधेश प्रदेशमा ४७ हजार ८९०, बाग्मती प्रदेशमामा ५ लाख ५४ हजार ९६९, हेटौंडामा १ लाख ३५ हजार ३९८ मात्रा खोप मौज्दात छ । गण्डकी प्रदेशमा ७ हजार ६९६, लुम्बिनी प्रदेशमा १ लाख ११ हजार ६, कर्णाली प्रदेशमा ५० हजार ५४६ र सुदूरपश्चिम प्रदेशमा ८ हजार ७५४ मात्रा खोप मौज्दात छ ।

शाखा प्रमुख डा. चौरसियाले माग भएमा प्रदेश र जिल्लामा खोप आपूर्ति गरिने जानकारी दिए ।

अहिले दैनिक १० भन्दा कम व्यक्तिमा संक्रमण देखिएको छ । नेपालमा अहिलेसम्म ६ करोड ३२ लाख ७६ हजार ७१० मात्रा खोप आइसकेकोमा कूल लक्षित जनसंख्यामध्ये ९९ दशमलव ५ प्रतिशतमा पहिलो मात्रा र ९५ दशमलव ७ प्रतिशतमा पूर्ण मात्रा खोप लगाइसकेको छ । कूल जनसंख्याको ७९ दशमलव ५ प्रतिशतले पहिलो मात्रा र ७६ दशमलव ५ प्रतिशतले पूर्ण मात्राको खोप लगाइसकेका छन् ।