अमेरिकाको अलाबामा राज्यमा रहेको मोन्टगोमेरी क्षेत्रीय विमानस्थलमा २६ दिनअघि भएको दुर्घटनाको विस्तृत विवरण भर्खर प्रकाशित भएको छ । 

अमेरिकन ईगल कम्पनीको इम्ब्राएर ई१७५ जेट विमान एयरपोर्टमा ओर्लिएर इन्जिन बन्द भइसकेको थिएन । तर पाइडमोन्ट एयरलाइन्सका लागि ग्राउन्ड एजेन्टका रूपमा काम गर्ने कोर्टनी एडवर्ड्स नामक महिला इन्जिनको एकदमै नजिक पुगेपछि उनलाई इन्जिनले खिचेको थियो । 

इन्जिनबाट टाढा बस्नका लागि एडवर्ड्सलाई कैयौंपटक चेतावनी दिइएको भए पनि उनले अटेरी गरेकी थिइन् । त्यसपछि इन्जिनले उनलाई खिच्यो र पूरै विमान नै बेस्सरी हल्लियो । 

डाल्लासबाट मोन्टगोमरी पुगेको उक्त विमानमा ५९ यात्रु तथा चार कर्मचारी थिए । उनीहरू कसैलाई पनि चोटपटक लागेको थिएन । 

विमान अवतरण गरेपछि पाइलटले इन्जिन बन्द गर्ने प्रक्रिया थालेका थिए । तर विमानको अघिल्लो भागको कार्गो ढोका खुला रहेको विषयमा उनलाई चेतावनी दिइएको थियो । 

त्यसपछि कोपाइलटले ग्राउन्डमा रहेका कर्मचारीहरूलाई विमानको इन्जिन खुलै रहेको विषयमा सचेत गराएका थिए । 

त्यसलगत्तै उनले चेतावनी दिने बत्ती बलेको देखे अनि विमान पनि बेस्सरी हल्लियो । अनि विमानको पहिलो इन्जिन आफैं बन्द भयो । 

के भएको भन्ने थाहा नपाएपछि उनले इमर्जेन्सी लाइट बन्द गरे अनि दुवैवटा ब्याट्री पनि निभाइदिए । त्यसपछि उनी विमानबाट ओर्लिएर के भएको हो छानबिन गर्न थाले । 

एडवर्ड्सले चेतावनीलाई बेवास्ता गर्दै इन्जिन नजिक गएकाले इन्जिनले उनलाई तानेको पाइयो । उनको त्यहीँ मृत्यु भयो । 

उनका तीन सन्तान र एक आमा छन् । गोफन्डमी पेजमा उनको परिवारलाई आर्थिक सहायता माग्दै चन्दा उठाइएको छ । त्यसमा अहिलेसम्म १ लाख डलर जम्मा भइसकेको छ ।