सत्ता गठबन्धनको तर्फबाट उपराष्ट्रपतिको उम्मेदवार बनाइएका जसपा नेता रामसहायप्रसाद यादवले महिला मात्र उम्मेदवार बन्ने कुनै संवैधानिक प्रावधान नभएको दाबी गरेका छन् । आफूविरुद्ध दर्ता गरिएको उजुरी खारेजगरी आफ्नो उम्मेदवारी कायम राख्न माग गरेका छन् । 

आइतवार बिहान नयाँ वानेश्वरस्थित निर्वाचन अधिकृतको कार्यालयमा पुगेर यादवले आफ्नो उम्मेदवारी संविधान अनुकूल नै रहेको दाबी गरेका हुन् । राष्ट्रपतिमा खस आर्य समुदायका रामचन्द्र पौडेल निर्वाचित भइसकेको सन्दर्भमा आफू फरक मधेसी समुदायबाट उम्मेदवार बनेको उनले स्पष्टीकरणमा लेखेका छन् । 
 

मधेसी समुदायलाई समावेशी समानुपातिकको सिद्धान्तअनुसार संविधानमा आरक्षण गरिएको जिकिरसहित यादवले उजुरी खारेजी गर्न माग गरेका छन् । निर्वाचन आयोगले आज उम्मेदवारको अन्तिम सूची प्रकाशित गर्ने तयारी गरेको छ । उपराष्ट्रपतिको निर्वाचन चैत्र ३ गते हुँदैछ ।