निर्माताबीच आन्तरिक विवाद नआइदिएको भए आजबाट अर्को नेपाली फिल्म ‘प्रसाद २’ पनि प्रदर्शनमा आएको हुन्थ्यो ।

तर, फिल्मका दुई निर्माताबीच आर्थिक अपारदर्शीताको विषयले फिल्म प्रदर्शन हुन सकेन । 

पूर्व निर्धारित मितिमा फिल्म प्रदर्शनमा आउन नसकेपछि यसका निर्देशक सुदर्शन थापाले दर्शक एवं शुभचिन्तकसँग माफी मागेका छन् ।

उनले सामाजिक सञ्जाल फेसबुकमा स्टाटस लेख्दै फिल्मको प्रदर्शन रोकिँन पुग्दा नेपाल र विदेशका वितरकलाई पर्न गएको आर्थिक तथा फिल्मको टिमका सदस्यमा पर्न गएको सिर्जनात्मक क्षतिप्रति दुःख व्यक्त गरेका छन् ।

निर्देशक थापाले लेखेका छन् ‘प्रदर्शन मिति आज चैत्र २४ लाई तय गरिएको फिल्म ‘प्रसाद २’ विविध कारणवश सार्वजनिक प्रदर्शनीमा आउन सकेन । यसबाट ‘प्रसाद २’का नेपाल र विदेशका वितरकलाई पर्न गएको आर्थिक क्षति तथा मेरो टिमका कलाकार, प्राविधिक र सर्जकहरूमा पर्न गएको सिर्जनात्मक क्षतिप्रति अन्तरमनदेखि दुःख व्यक्त गर्दछु । र, दर्शक शुभचिन्तकप्रति माफी चाहन्छु । समस्या समाधान भई छिट्टै प्रदर्शन मितिसहित आउन पाउने छौं भन्ने आशा राखेको छु ।’