हल रिलिजको समयमा दर्शक तथा समीक्षकबाट प्रशंसा पाएको फिल्म ‘प्रेमगन्ज’ ओटिटीमा रिलिज हुने भएको छ । 

सिनेमाघर एपमा सार्वजनिक हुन लागेको फिल्मले आउँदो नयाँ वर्ष अर्थात् वैशाख १ गतेबाट ओटिटी यात्रा सुरु गर्नेछ ।

पूर्वसन्ध्यामा ‘फेरी भेट होला नहोला’ बोलको गीत रिलिज गर्दै निर्माण टिमले हलमा छुटेका दर्शकलाई लक्षित गरी फिल्म सार्वजनिक गर्न लागेको जानकारी गराएको हो । 

परिच्छेद सेनको लेखन तथा निर्देशन रहेको फिल्मले हेर्ने जति दर्शकबाट राम्रो प्रतिक्रिया पाएको थियो ।

समीक्षकले पनि फिल्मको निर्देशन तथा कलाकारको अभिनयको तारिफ गरेका थिए ।

प्रेमकथा श्रेणीको फिल्ममा तेज गिरी र बेनिशा हमालको अभिनय रहेको छ ।

दुई कालखण्डको प्रेमकथा प्रस्तुत गर्ने फिल्ममा राइडर प्रशान्त, सुप्रिया खनाल, सिम्रन खड्का, सम्पदा बानियाँ, नरेश पौडेल, रश्मी भट्ट, गीता अधिकारी, पवन भट्टराई लगायतको समेत अभिनय छ ।

अभिनेत्री सुरक्षा पन्त फिल्ममा अतिथि भूमिकामा छिन् ।

चलचित्र चौतारीले निर्माण गरेको फिल्मको कार्यकारी निर्माता अनन्तमान श्रेष्ठ हुन भने प्रस्तुत कर्ता राजु फुयाँल हुन् ।

फिल्ममा सञ्जय लामाको छायांकन र अर्जुन जिसीको सम्पादन रहेको थियो ।