०४ असार २०८३, बिहीबार
खोटेहाङ गाउँपालिका–९ लिच्कीराम्चेस्थित माबेमा सञ्चालित भानु आधारभूत विद्यालयमा माध्यमिक तहको पठनपाठन शुरूआत गरिएको छ ।
विक्रम संवत् २०२६ सालमा स्थापना भएको भानु विद्यालयलाई गाउँपालिकाले यही शैक्षिकसत्रदेखि ९ कक्षा सञ्चालनको अनुमति दिएसँगै मावि तहको कक्षा शुरू गरिएको हो ।
९ कक्षामा ३१ विद्यार्थी भर्ना गरेर पठनपाठन शुरू गरिएको गाउँपालिकाका प्रमुख उदिमबहादुर राईले बताए ।
गाउँमै मावि तहको विद्यालय सञ्चालन भएसँगै लिच्कीराम्चेका विद्यार्थीले ३ घण्टा पैदल हिँडेर छिमेकी वडामा सञ्चालित सिम्पानी मावि सिम्पानी पुग्नुपर्ने बाध्यता अन्त्य भएको छ । स्थानीय अभिभावकले संकलन गरेको चन्दा तथा गाउँपालिकाको सहयोगले मावि तहको विद्यालय सञ्चालन गरिएको प्रधानाध्यापक गोपाल राईले बताए ।
सो अवसरमा गाउँपालिका उपप्रमुख रुपेश राई, वडाध्यक्ष इन्द्रबहादुर राई, नेकपा एमालेका प्रदेश समिति सदस्य राजन ढकाल, नेकपा माओवादी केन्द्र गाउँपालिका अध्यक्ष दीपेन्द्र राई लगायतले शुभकामना दिएका छन् ।
मावि तह सञ्चालनार्थ चन्दा सहयोग गर्ने अभिभावकलाई सम्मानपत्र समेत प्रदान गरिएको थियो । निमावि राहत ३, प्रावि राहत १, बालविकास सहायक १, निजी १ र प्रावि दरबन्दी ४ गरी १० शिक्षक रहेको विद्यालयमा हालसम्म १८८ विद्यार्थी भर्ना भएको विद्यालय प्रशासनले जनाएको छ ।
विद्यार्थी भर्ना अभियान जारी रहेको विद्यालयमा गाउँपालिका र वडाले १/१ जना मावि शिक्षक व्यवस्था गर्ने सहमति भएको प्रधानाध्यापक राईले जानकारी दिए । विक्रम संवत् २०७८ सालको जनगणनाअनुसार ३ हजार ५७७ जनसंख्या रहेको लिच्कीराम्चेमा लक्ष्मी मावि समेत सञ्चालित छ ।
