०७ असार २०८३, आइतबार
सामुदायिक विद्यालयमा विद्यार्थीको आकर्षण घटिरहेको बेला रोल्पाको एक विद्यालयमा भने धान्ने नसक्ने गरी विद्यार्थीको चाप बढेको छ ।
रोल्पा सदरमुकाम लिवाङस्थित बालकल्याण माविमा चालू शैक्षिक सत्रमा करीब ३ हजार विद्यार्थी भर्ना भएका छन् ।
विद्यालयमा धान्ने मुस्किल हुने गरी विद्यार्थीको चाप बढेको छ । यहाँ नर्सरीदेखि १२ कक्षासम्म पठनपाठन हुने गर्दछ । विद्यालयले नर्सरीदेखि ५ कक्षासम्म अंग्रेजी भाषामा तथा ६ देखि १० कक्षासम्म अंग्रेजी र नेपालीमा पठनपाठन गराउँदै आएको छ ।
११–१२ कक्षामा मानविकी, शिक्षाशास्त्र, व्यवस्थापन र विज्ञान विषयमा पठनपाठन हुँदै विद्यालयले सीटीईभीटीबाट सम्बन्धन प्राप्त गरी सिभिल इन्जिनीयरिङ विषयमा ३ वर्षे डिप्लोमा र एनेक्स कार्यक्रमअन्तर्गत १८ महिने सबओभसियर विषयमा समेत पठनपाठन गराउन थालेको छ ।
चालू शैक्षिक सत्रमा शिसु कक्षादेखि १० कक्षासम्म १ हजार ८१७ विद्यार्थी भर्ना भएका विद्यालयका प्राचार्य मधुसुदन पोख्रेलले बताए । जिल्लाकै पुरानो माध्यमिक विद्यालयको रूपमा रहेको विद्यालय २०२३ सालमा स्थापना भएको हो ।
विद्यालयले २०५२ सालदेखि उच्च मावि तहमा पठन पाठन शुरू गरेको हो । हाल विद्यालयको ११ र १२ कक्षामा ८२२ विद्यार्थी अध्ययन गरिरहेका छन् ।
सिभिल इन्जिनीयरिङ डिप्लोमा र प्रि डिप्लोमा तहमा थप १४० सहित विद्यालयमा २ हजार ७५६ विद्यार्थी अध्ययनरत छन् ।
