मैले बा आमा त्यागेर रोजेको

मायाले मलाई धोका दियो

स्वरुपराज आचार्यको स्वरमा डेढ दशकअघि सार्वजनिक यो गीतलाई निकै रुचाइयो । 

हरिहर खनियाको शब्द एवं संगीत रहेको गीत ‘दोष’ एल्बममा समावेश थियो । अहिले पनि प्रेम विरहको उक्त गीत धेरैको दिल दिमागमा ताजै बनेर बसेको छ । 

धेरैको मन जितेको सोही गीत यतिबेला गायिका अञ्जु पन्तको स्वरमा सार्वजनिक गरिएको छ । 

गीतकार एवं संगीतकार खनियाले आइतवार बिहान अञ्जुको स्वरमा आफ्नो हिट गीतको फिमेल भर्सन सार्वजनिक गरेका हुन् । राजकुमार बगरको मिक्सिङ र माष्टरिङ रहेको गीतलाई विशाल निरौलाले एरेन्ज गरेका छन् । 

गीतकार एवं संगीतकार खनियाले आफूले झन्डै १८ वर्षअघि कसैको वास्तविक कथालाई टिपेर यस गीत लेखेको स्मरण गरे । 

‘वास्तविक जीवनसँग मेल खाने भएर होला धेरैले मन पराउनुभयो । त्यसबेला अत्याधिक रुपमा चर्चा भएको गीत हो’ उनले भने, ‘अहिले अञ्जु पन्तको स्वरमा सार्वजनिक गीतलाई पनि स्रोता-दर्शकले रुचाउनुहुनेछ भन्ने विश्वास छ ।’ 

विक्रम चौहानको कथा, कन्सेप्ट एवं निर्देशनमा फिमेल भर्सनको भिडियो तयार भएको छ। 

भिडियोमा विक्रम बुढाथोकी, शिल्पा पोखरेल र प्रमिता राजघतानीको अभिनय छ । 

गीतकार प्रतिष्ठान नेपाल पोखराका अध्यक्षसमेत रहेका खनियाले आफ्नै अफिसियल ‘हरिहर खनिया’ युट्युब च्यानलमार्फत गीत सार्वजनिक गरेका हुन् ।